iPhone эгаси ғайри оддий равишда ҳаётдан кўз юмди
Буюк Британия пойтахти Лондон шаҳрида 32 ёшли Ричард Булл билан содир бўлган фожиа смартфон фойдаланувчиларни сергак тортишга мажбур қилди. Маълум бўлишича, марҳум розеткада қувват олаётган айфон смартфонининг ваннага тушиб кетиши туфайли ҳаётдан кўз юмган.
Ваннада ҳушсиз ётган Ричардни кўрган турмуш ўртоғи тез ёрдамга қўнғироқ қилади. Жасаднинг кўкрагидаги қора доғлар боис аввалига уни ўлдиришган, деб ўйлашади. Сўнг ваннадан айфон топилган ҳамда вазият ойдинлашган. Экспертиза хулосаси ҳам британияликнинг электр токи уриши натижасида жон берганини тасдиқлади.
Ричард Булл айфоннинг қувватлантиргичини токка тиқиб, смартфонни унга улаган ёки улашга ҳаракат қилаётган бўлган. Телефон аппаратининг кутилмаганда ваннага тушиб кетиши ва қисқа туташув ўлимга сабаб бўлган. Бунгача шунга ўхшаш фожиа москвалик iPhone фойдаланувчиси билан ҳам 2015 йилда содир бўлган.
Биз сизнинг хавфсизлигингиз, техника хавфсизлигини ёдингизга солиш учун ҳам бу материални тайёрладик. Умрингиз узоқ бўлсин.
