iPhone SE “ижоди”га мансуб илк 7 та таассуротли сурат
Йирик диагоналли смартфонлар урфга кираётган бир пайтда, жажжи iPhone SE айфонини тақдим қилган Apple’нинг жасоратига қойил қолмасдан илож йўқ.
Apple’нинг флагман процессорига эга iPhone SE 4K видеотасвир ёза оладиган, сифатли сурат олиш истеъдодига эга ўткир нигоҳли смартфондир.
Apple компанияси iPhone SE’да олдинги авлод камераларига қараганда такомиллаштирилган янги жиҳатларни жорий қилишга эришган. Хусусан, 1,22 микрон пиксель ҳажмли, f/2,2 диафрагмали 12 мегапикселли камера фотосурат ишқибозлари учун айни муддао.
Янги камерада татбиқ қилинган асосий ва иккинчи даражали пикселларни бир-биридан фарқлаш технологияси хира соя ва ортиқча ёруғликнинг бартараб бўлишини ва суратнинг аниқлигини таъминлаган.
Аҳамиятли жиҳати шундаки, iPhone SE камерасида суратни қайта ишлайдиган махсус қўшимча процессор мавжуд. Ушбу процессордаги Focus Pixels технологияси тасвирдаги пикселлар мутаносиблигини созлайди, уларнинг уйғун равишда бирикишига хизмат қилади ва суратнинг оптик барқарорлигини таъминлайди.
iPhone SE камерасини синовдан ўтказиш жараёнида кўпчилик унинг сифатли суратларини эътироф этган. Ҳатто унинг камерасига нисбатан “манзарага тутилган кўзгу” дея ҳазил тариқасидаги мақтов ҳам ишлатилмоқда.
Биргина камчилик – камерадаги оптик барқарорлик бир оз кучсиз эканлиги айтилмоқда. Лекин, бу “ожизлик” аксарият вазиятда олинган суратларда кўзга ташланмайди.
Мисол учун, Time журнали фотографи Бенжамин Лоуининг қайд этишича, ихчам айфонда олинган суратлардаги ранглар уйғунлиги, деталларнинг ёрқинлиги юқори даражада экан.
iPhone SE камерасида олинган 4К форматидаги юқори сифатли видеони Apple A9 процессори ёрдамида реал вақт жараёнида таҳрир қилиш, видеотасвир кадрини 4 маротаба яқинлаштириш, ундан 1080p форматидаги ёрқин суратни сақлаб олиш мумкин.
Қуйида сизга MacDigger интернет нашри томонидан тайёрланган, iPhone SE’да олинган, унинг имкониятини намойиш қилган суратларни тақдим қиламиз.
