iPhone X билан 99 фоизга бир хил илк смартфон 240 доллардан тақдим этилди

  •   DiMaX
  •  2743
  •  09.02.2018 09:53

iPhone X билан 99 фоизга бир хил илк смартфон 240 доллардан тақдим этилди

ҳозир – Apple’нинг юбилей айфони дизайнида смартфонлар яратиш ишлари айни қизиган палла. Кечагина бу борадаги биринчи муваффақиятли натижалардан бири – UMIDIGI Z2 модели ҳақида ёзгандик.

ЎҚИНГ: iPhone X’нинг чорак нархида унинг илк ҳақиқий «кушанда»си намойиш этилди!

Бугун эса «осмон ости салтанати»дан шу борада яна бир янгилик чиқди – бу гал аввал умуман номини ҳеч ким эшитмаган OWWO компанияси бирданига «ярқ» этиб балқиди. У купертиноликларнинг суперфлагманини дизайнини 99 фоиз аниқликда такрорловчи дунёдаги биринчи смартфонни тақдим этди.

Бошқа клонлардан фарқли равишда, OWWO X русумли бу телефон iPhone X’га кўп жиҳатдан яқин. Жумладан, худди Apple юбилей айфонидаги каби, унинг 5,7 дюймли экрани тепасида ҳам «кемтик» мавжуд. Гарчи дисплей IPS технологияси бўйича ишланган эса-да, унинг тасвир аниқлиги Full HD+ форматида – 1920х1080 пикселли.

Ишлаб чиқарувчининг расмий сайтида таъкидланишича, OWWO X смартфонига 64 битлик MediaTek процессори қўйилган. У 2,5 гигагерц такт частотасида ишловчи нақ ўнта ядрони ўзида бирлаштирган!

OWWO X’нинг 16 мегапикселли асосий камераси қўшалоқ бўлиб, унинг орқа корпусда жойлашуви худди купертиноликнинг суперфлагманидаги кабидир. Смартфоннинг тезкор хотирасининг ҳажми 3 гигабайт, доимий хотираси ҳажми эса 32 гигабайтни ташкил этади. Қурилмани 3180 мА/соат сиғимли аккумулятори қувват билан таъминлайди.

Ушбу Android-клон тўртинчи авлод уяли алоқа тармоғида ишлаш учун LTE модули билан жиҳозланган. Смартфон Android операцион тизимининг 7.0 Nougat талқини бошқаруви остида ишлайди.

OWWO X расмий нархи 1499 юанга тенг, бу эса тахминан 240 АҚШ долларига яқин. Расмий маълумотларга кўра, компания келажакда бу телефонни  1/16 ГБ ва 2/32 ГБ хотирага эга модификацияларда ҳам савдога чиқармоқчи. Улар янада арзон нархли ва сал заифроқ процессорга эга бўлиши табиий.

Ҳозирча мазкур клон-смартфонга фақат Хитойда, ишлаб чиқарувчининг расмий сайти орқалигина буюртма бериш мумкин. Балки, ўшанда ушбу «хитойча iPhone X»ни онлайн савдо платформалари орқали харид қилиш имкони ҳам пайдо бўлса керак.

ЎҚИНГ: AliExpress’даги товарларга «Terabayt.uz» орқали буюртма беринг!

Сайтимизнинг энг чиройли расмларини Инстаграмдаги саҳифамизда томоша қилинг!

DiMaX

Технологияларга қизиқувчи, бу борадаги янгиликларни имкон қадар кузатувчи ва маъқул топганларини бошқалар билан баҳам кўришни ёқтирувчи фрилансер.