iPhone X дизайнидаги ҳамёнбоп Redmi S2: «жонли» видео ва суратлари, нархи ва хусусиятлари, тақдимот санаси...

  •   DiMaX
  •  5153
  •  03.05.2018 18:12

iPhone X дизайнидаги ҳамёнбоп Redmi S2: «жонли» видео ва суратлари, нархи ва хусусиятлари, тақдимот санаси...

Xiaomi компанияси Redmi S2 русумли янги ҳамёнбоп смартфон тайёрлаётгани ҳақидаги илк хабарлар бундан икки ҳафтача аввал чиқа бошлаган эди. Ушбу модел компаниянинг навбатдаги флагмани – Mi 6X билан бирга тақдим этилиши тахмин қилинганди. Бироқ арзон смартфоннинг намойиши кейинроққа қолдирилган экан.

ЎҚИНГ: Арзон, аммо «қўшкўз» Xiaomi Redmi S2 смартфони ҳам сотувга тайёр!

Энди эса Xiaomi компаниясининг расмий вакиллари Redmi S2 моделининг 10 май куни тақдим этилажагини маълум қилишди.

Шунингдек, бу смартфон аллақачон мазкур бренднинг Чехия ва Вьетнамдаги расмий дўконларига етказиб берилган ҳам экан. У ерларда Redmi S2 смартфонининг нафақат техник хусусиятлари ва нархини аниқлашди, балки «жонли» суратга, ҳатто видеога олишга ҳам улгуришди.

Хулласи калом, Прагадаги Xiaomi дўконидан олинган маълумотларга кўра, Redmi S2 девайси диагоналига 5,99 дюймга тенг бўлган, HD+ форматли (1440×720 пикселли) экран билан жиҳозланган.

Qualcomm Snapdragon 625 процессори базасида ишлайдиган ушбу гаджетнинг «қувват тоши» 3080 мА/соатлик ток сиғимига эга.

Аввалроқ «сизиб чиққан» хабарларга кўра, Redmi S2 модели хотирасининг ҳажмига кўра ҳар хил талқинларда тақдим этилади. Жумладан, унинг тезкор хотираси 2, 3 ва 4 гигабайтлик, доимий хотираси эса 16, 32 ҳамда 64 гигабайтлик вариантлари мавжуд. Унга яна 128 гигабайтгача ҳажмдаги microSD форматли хотира картасини ўрнатиш мумкин бўлади.

ЎҚИНГ: Xiaomi Redmi S2: янада кўпроғини кутинг

Redmi S2 моделини тайёрлаётиб, Xiaomi компанияси селфи ишқибозларига кўпроқ ён босган кўринади. Зеро, унинг олд камераси 16 мегапикселли суратлар олишга қодир.

Шунингдек, асосий камера ҳам чаккимас (агар смартфоннинг ҳамёнбоплигини инобатга олсак, бу камерани ҳатто зўр дейиш мумкин). iPhone X дизайнида – объективлари тикка жойлашган ушбу қўшалоқ камера 12 ҳамда 5 мегапикселли датчикларни ва LED-чақноқни ўз ичига олган.

«Хитойча Apple»нинг ушбу қурилмаси MIUI 9 график қобиғи остидаги Android 8 Oreo операцион тизим талқини бошқаруви остида ишлайди.

Вьетнамдаги Xiaomi расмий дўконида эса Redmi S2 моделининг маҳаллий нархини ҳам аниқлашди. Реклама лавҳасида кўрсатилишича, ушбу смартфонга 3.999.000 донг ҳажмида нарх белгиланган, бу эса тахминан 175 АҚШ долларига тенг.

Мана, Xiaomi Redmi S2 смартфонини «жонли» видеода томоша қиламиз:

Мазкур смартфон бозорга қачон тақдим этилиши ҳозирча аниқ эмас, лекин Xiaomi’нинг аллақачон савдога чиқарилган бир қатор смартфонлари ва бошқа маҳсулотларини юртимизда ҳам расман харид қилиш имкони мавжуд.

ЎҚИНГ: Xiaomi’нинг турли гаджетлари нархлари – харидингиз Ўзбекистон бўйлаб етказиб берилади! (2018 йил 26 апрель)