iPhone X ишлаб чиқариш жиддий қисқаргани маълум бўлди
iPhone X савдо чиқарилганидан сўнг юзага келган талабдан сўнг кўпчилик камида 1 йилдан сўнг Apple бозордаги бу эҳтиёжни қондириши мумкинлигини айтган эди. Бироқ, бу -- хато фикр бўлиб чиқди.
Американинг Apple корпорацияси куни кеча кутилмаганда январь-март ойларида iPhone X смартфонини ишлаб чиқаришни 2 баробарга қисқартиришга қарор қилди.
Бунинг бош сабаби сифатида флагманнинг АҚШ, Европа, Хитойдаги савдосининг кескин тушиб кетгани айтилмоқда.
Натижада янги айфон ишлаб чиқариш салоҳияти 40 миллион донадан 20 миллионга пасаяди. Нисбатан арзон ҳисобланган iPhone 8 ва iPhone 8 Plus моделларини ишлаб чиқариш ўзгаришсиз қолади — январь ва март ойларида 30 млн дона смартфон бозорга чиқарилади. Canalys тадқиқотчиларининг ҳисоб-китобларига кўра, 2017 йилнинг IV чораги якунлари бўйича 29 миллион дона iPhone X сотилган.
Ўқинг: iPhone X: экспертлар флагманнинг таннархини айтишди
Айтиш жоизки, iPhone X — тарихдаги "энг қиммат айфон". АҚШ да унинг бошланғич баҳоси $999 доллар бўлган бўлса, жаҳон мамлакатларида 1400 АҚШ долларигача сотилди. Кўпчиликнинг фикрича, бу ўта инсофсизлик. Смартфоннинг нарх-навоси синчиклаб ўрганилганида, гаджетнинг нархи унинг таннархидан 60% га кўпроқ экани аниқланган. Яъни, Apple энг қиммат флагмани учун $412 доллар сарфлаган экан.
Маълум қилинишича, iPhone X ишлаб чиқарилишининг камайиши Apple ва бутловчи қисмлар етказиб берувчи компаниялар ўртасида жиддий муаммолар келтириб чиқаради. Жумладан, Япониянинг Murata Manufacturing, Kyocera, Sony ва TDK каби iPhone учун плата ва камера сенсорлари, аккумулятор батареялари етказиб берувчи компаниялари бундан қаттиқ жабрланадилар.
KGI Securities таҳлилчиси Мин Чи Куонинг қайд этишича, бу йил Apple анъанани бузади ва 3 та янги айфон моделини тақдим қилади. Улардан бири нисбатан жуда арзон, яъни $700–800 АҚШ доллари баҳосида бўлади. Воқеалар ривожини бизда кузатиб боринг.
