iPhone X ишлаб чиқариш тўхтатилади. Муҳим сабаб билан!
Американинг Apple компанияси iPhone X флагманини ишлаб чиқаришни тўхтатмоқчи. Бу тўғрида нуфузли Daily Mail нашри хабар тарқатди.
Маълум қилинишича, бу қарор бозорда флагманга бўлган талабнинг кескин тушиб кетгани билан боғлиқ. Янги смартфон модели компания таҳлилчилари кутган даражада оммалашмади.
Натижада, iPhone X Apple ишлаб чиқаришни тўхтатган иккинчи телефон модели бўлиши мумкин. Компания 2014 йилда iPhone 5C моделини ҳам қисқа муддат ичида ишлаб чиқаришдан олиб ташлаган эди.
Шу билан бирга, ишончли манбанинг маълум қилишича, Apple компанияси iPhone X "инқирози"га қарамасдан, янада такомиллашган iPhone X Plus моделини ишлаб чиқара бошлайди.
Эслатиб ўтамиз, Apple корпорацияси бир муддат аввал вақт ўтиши билан айфонларнинг платформа тезкорлигини секинлаштириб қўйиши ҳақидаги хабарлардан сўнг фойдаланувчилар томонидан кескин танқид қилинган эди. Бу хабар компания томонидан тасдиқлангач, бозордаги савдо кўрсаткичларининг тушиб кетишига таъсир ўтказган ҳам бўлиши мумкин.
Корпорация шу кунларда айфонларнинг қанчалик секинлаштирилаётганини кузатиш имконини берувчи дастур устида ҳам иш олиб бормоқда. Унинг ёрдамида iPhone қурилмасидаги автоматик секинлаштириш функциясини ўчириб ҳам қўйиш мумкин бўлади.
Apple, шу билан бирга, iOS операцион тизимининг сўнгги талқинида бир нечта iPhone моделлари ҳам секинлаштирилганини тан олди. Бунинг асосий сабаби сифатида смартфон аккумулятори фаолиятини узоғроққа чўзишдан иборат.
Компания сайтида қайд этилишича, бундай амалиёт сўнгги операцион тизим ёрдамида iPhone 6, iPhone 6S, iPhone SE каби моделларда татбиқ этилган. Шу билан бирга, бундай технология iOS 11.2 орқали iPhone 7 модели учун ҳам жорий қилинган бўлган. Ва, албатта, фойдаланувчилар бунгача бундан бехабар бўлишган.
