iPhone X яккаҳокимлигига чек қўйишмоқчи – BOE «ўйиқли» AMOLED-дисплей яратди!
Бугунги кунда OLED-дисплейлар бозорида Samsung компанияси етакчи бўлиб келаётир. Аммо бошқа кўплаб ишлаб чиқарувчилар ҳам шу йўналишни ривожлантиришга сармоя киритиб, мазкур технология устида фаол иш олиб боришмоқда. Ҳали 2018 йилданоқ бу бозорда Samsung монополиясига чек қўйилиши мумкин, дейишмоқда таҳлилчилар.
OLED соҳасида иш олиб бораётганлардан бири Хитойдаги BOE компаниясидир, деб ёзади ixbt.com. У аллақачон бу борада ютуққа эришди ҳам: худди iPhone X экрани каби – юқориси «кемтик»ли, янги AMOLED-дисплейнинг ишчи прототипини яратди.
ЎҚИНГ: iPhone X экранидаги «ўйиқ» – Apple’нинг ажойиб «имзо»си!
BOE яратган мазкур экраннинг ўлчами диагоналига 6,18 дюймни ташкил этади. Дисплейнинг тасвир аниқлиги 2992х1440 пикселга тенг, панелнинг ёрқинлиги эса 390 нитни ташкил этади.
ИЗОҲ: Экран ёрқинлиги ўлчови ҳақида қуйидаги мақоламизда маълумот берилган: Энг яхши смартфон дисплейи аниқланди ва бу...
Шу тариқа, BOE компанияси биратўла иккита гигантга – OLED дисплей соҳасида Samsung’га ва «ўйиқли» экран бўйича Apple’га қарши майдонга тушаётир.
Табиийки, BOE ишлаб чиқарадиган AMOLED-дисплейлар Samsung’никига нисбатан арзонроққа тушади. Аммо гап бошқа ёқда: улар тегишли сифат стандартларига жавоб бера олармикан?
Яхшиси, буни билиш учун мазкур панелларни смартфонга ўрнатилганидан сўнг баҳолашларини кутамиз. Бу борадаги янгиликлардан биринчилар қаторида бохабар бўлиш учун биздан узоқлашманг.
ЎҚИНГ: DisplayMate жаҳондаги энг яхши дисплейли смартфонни айтди
