Жаҳоннинг энг харидоргир планшети маълум бўлди
Планшет ишлаб чиқаришда ҳам Apple ва Samsung компаниялари жаҳонда тенгсиз ва жиддий рақиблар. Бироқ, смартфон саноатида етакчи бўлган кореялик бу борада америкалик гигантнинг олдига туша олмайди.
IDC халқаро маркетинг тадқиқотлари компаниясининг маълум қилишича, айни пайтда жаҳонда сотилаётган планшетларнинг 30 фоизи Apple ҳиссасига тўғри келади. Яъни, Apple iPad жаҳонда энг кўп сотилаётган планшет экан.
Сўнгги чорак якунлари хусусида тўхталар экан, Apple етакчиси Тим Кук 2014 йилдан кейин ниҳоят бу чоракда планшет савдосида ўсиш кузатилганини қайд этди. Натижада, 2017 йилнинг 3-молиявий чорагида корпорация 11,4 млн дона шу турдаги гаджет сотган, Яъни, ўтган йилнинг шу даврига нисбатан ўсиш 15% ни ташкил қилмоқда.
Шундай қилиб, ўтган чоракда Apple 11,4 млн дона iPad планшетидан сотди. IDC таҳлилига кўра, бу ўсиш Apple'га даромад билан бирга, планшет бозорида яққол пешқадамга айлинш имконини ҳам берди.
Аҳамиятли жиҳати шундаки, жаҳонда планшетга бўлган эҳтиёж кескин тушиб бораётган бир пайтда, iPad гаджети оммалашиб бормоқда. Таҳлиллардан маълум бўлишича, дунё бўйича планшет савдоси 3,4% га, яъни 37,9 млн донага камайган.
IDC экспертларининг қайд этишларича, Apple муваффақияти ортида 2 та янги iPad моделларининг савдога чиқарилиши ва нарх-наво масаласида компаниянинг бир оз чекингани турибди. Натижада, кўпчилик фойдаланувчилар эски планшетларидан воз кечиб, янги авлод гаджетларига эга бўлишди.
Калифорниялик компаниядан сўнг рейтингда унинг кореялик ашаддий рақиби Samsung турибди. Бу чоракда Samsung 6 млн дона планшет сотган. Унинг жаҳон планшет бозоридаги улуши 15,8% ни ташкил қилади.
Пешқадам учликни Хитойнинг Huawei компанияси якунлаб беради. Унинг бозордаги ҳиссаси 8%, яъни компания 3 млн дона планшет сотган. Ундан кейинги ўрин "ҳамюрти" Lenovo'га насиб қилган. Бу бренд 2.2 млн дона планшет сотган.
