Жозибадор Galaxy Note 9 илк марта кўриниш берди
Samsung корпорацияси шу ойда жамоатчилик эътиборига Galaxy S9 ва Galaxy S9+ флагман смартфонларини ҳавола қилади.
Шу билан бирга, бу ишлаб чиқарувчи айни пайтда Galaxy Note 9 модели устида ҳам тер тўкмоқда. Жорий йилнинг август-сентябрида тақдимоти кутилаётган гаджет бу йилги энг сўнгги ва илғор мобил технологияларга эга бўлади. Нарх ҳам шунга яраша -- "самовий"!
Кечагина Samsung Galaxy Note 9 смартфони акс этган илк суратлар интернет тармоғини "забт этди". Ўзингиз гувоҳи бўлиб турганингиздек, янги флагман ҳашамдор ва жозибадор дизайнда ишланган.
Албатта, флагман чиндан ҳам кучли бўлади. Қолаверса, Samsung компанияси 2017 йилнинг якунида янги йилда мобил телефон саноатида "инқилобий смартфон"нинг тақдим этилишини маълум қилган эди.
Суратларда акс этган девайсга диққат қаратадиган бўлсак, кўриниб турибдики, Galaxy Note 9 девайси тўлиқ ромдан холи бўлади. Олд панелнинг 98% дан ошиқ қисми экрандан иборат бўлган.
Олд панелдаги барча сенсорлар учун зарур ўйиқлар тўғридан-тўғри дисплейнинг ўзидан тешилган. Олд панелнинг қуйисида эса экранга жойлаштирилган виртуал бармоқ изи сканери мавжуд. Телефон корпуси тўлиқ шишадан тайёрланган. Орқа панелда қўш сенсорли бош камерага дуч келамиз.
Galaxy Note 9 смартфони корпусининг қуйи қисмида махсус туйнук бўлиб, у ерга S Pen стилусини жойлаштириш мумкин. Бундай қулайликни туркумнинг аввалги моделларида ҳам кўрганмиз.
Телефонни USB Type-C технологиясининг иккинчи авлод порти орқали қувватлаш мумкин. Google ва Apple ва бошқалар анъанавий аудио туйнукдан воз кечишган бўлса ҳам, янги флагманда Samsung компанияси аудио қулоқчинлар учун 3,5 мм.ли портни қолдирган.
Galaxy Note 9 моделининг техник хусусиятлари ҳақида тўхталадиган бўлсак, унинг 8 ядроли Qualcomm Snapdragon 845 (АҚШ ва Европа) ёки Samsung Exynos 9810 (бошқа ҳудудлар) процессорига эга бўлишини айтиш мумкин.
Янги телефон корпуси IP68 стандарти бўйича чанг ва сувдан ҳимояланган бўлади. Кореялик бу илғор смартфон хусусидаги илк расмий маълумотларнинг шу йилнинг май-июнь ойларидан бошлаб тақдим этилиши кутилмоқда.
Бизнинг ҳисоб-китобларимизга кўра, Galaxy Note 9 жаҳон смартфон бозорларида ўртача 1,400 АҚШ доллари баҳосида, яъни Galaxy Note 8 моделидан 200 доллар қимматга, 2017 йилнинг кузида сотувга чиқарилади.
