Касперский бепул антивирус чиқарди ва бошқа антивирусларни «илма-тешик» деб атади!
«Касперский лабораторияси» кеча – 2017 йилнинг 25 июлида, компаниянинг 20 йиллик юбилейига бағишлаб бепул антивирусни чиқарди. Бу ҳақда Евгений Касперский ўзининг расмий блогида эълон қилган.
Мазкур антивирус Kaspersky Free деб аталади ва унинг хусусиятлари билан махсус саҳифада танишиш мумкин. Айтиш керакки, ушбу маҳсулот антивируснинг пулли версиялари билан рақобатга киришмайди – уларнинг қўшимча опциялари барибир кўпроқ.
Хабарда айтилишича, бепул антивирусни чиқаришдан мақсад – мазкур бозорда ўз улушини ошириш билан бирга, «премиал ҳимояга пули бўлмаган, шу боисдан илма-тешик маҳсулотларни ўрнатишга ва ҳатто ёпишиб олувчи Microsoft Windows Defender’дан фойдаланишга мажбур бўлаётган» фойдаланувчиларга ғамхўрлик қилишдир.
Компаниянинг таъкидлашича, «Kaspersky Free ўрнатишларининг сони ошиб бораверса, барча фойдаланувчилар учун ҳимоянинг сифати ошишига ижобий таъсир кўрсатади; чунки машина ўрганиши технологияси учун big data базаси кенгайиб боради».
Айтиш керакки, Kaspersky Free дунёнинг турли мамлакатларидаги фойдаланувчиларига босқичма-босқич тақдим этилади.
