Кераксиз SMS ва қўнғироқларни ISY Block билан чеклаймиз
Баъзида бирор муайян киши ёки
ташкилот қўнғироқ қилиб безовта этмаслигини истайсиз. Ёки ишларингиз тиғиз
пайти телефон орқали мулоқотларга қимматбаҳо вақтингизни сарфлашни хоҳламайсиз.
Шу каби ҳолатларда сизга Android тизимли смартфонлар учун ишлаб чиқилган ISY
Block иловаси кўмакка келади.
Бу дастурни ўрнатиб олгач, унинг асосий параметрларини ўзингиз белгилаб
оласиз: пароль белгилайсиз ва интерфейснинг рангини танлайсиз. Унинг кўриниши
жуда тушунарли бўлиб, ортиқча маълумотлар билан тўлдириб ташланмаган.
Мана шу ерда сиз «тинч режим»ни
созлаб қўйишингиз мумкин. Унда белгиланган вақт мобайнида сизга ҳеч ким
қўнғироқ қилиб туша олмайди. Масалан, иш пайтингиз чалғитмасликларини истайсиз.
Ёки тунги вақтда безовта этишларини хоҳламайсиз. Шундай вақтларда телефонингизга
кирувчи қўнғироқлар чекланади.
ISY Block’нинг бош менюси худди смартфондаги оддий контактлар рўйхатига
ўхшаш қилиб ишланган. Бирорта контактни танлаганингизда, қалқиб чиқувчи
ойначани кўрасиз. Ўша ерда шу кишидан келувчи қўнғироқ ва SMS-хабарларни блоклашни
созлайсиз.
Яхши имконият – агарда битта контактда бир нечта рақам мавжуд бўлса,
улар орасидан танлаб айримларини алоҳида чеклаш ҳам мумкин. Шундан кейин,
блокланган контакт умумий рўйхатда қизил нуқта билан белгиланиб қолади. Бундан ташқари,
барча блокланган контактлар рўйхатини алоҳида варақада ҳам кўришингиз мумкин.
Қизиғи шундаки, ISY Block иловасида яна бир имконият бор: кирувчи
қўнғироқларни «Терилган рақам мавжуд эмас» дея жавоб бериб ҳам рад эта олади.
Қўнғироқларни чеклашдан ташқари, бу дастурнинг ISY Messenger деб
аталувчи – SMS-хабарларни чекловчи функцияси ҳам мавжуд. Унинг интерфейсиям Android’нинг
стандарт мессенжерига жуда ўхшаш. Бирор кишидан хабар келмаслигини истасангиз, у
билан бўлган ёзишмага кирасиз ва қулф белгичасини босасиз – олам гулистон!
Хулласи калом, ISY Block иловасида ҳаммаси содда ва қулай – телефон
контактларининг «қора рўйхат»ини ўзингиз бошқаринг ва сизни ортиқча безовта
қилишмайди. Тағин, буларнинг барчаси бепул ва рекламасиз ишлашини айтмайсизми!
Мазкур иловани Google Play’дан мана бу ҳавола орқали юклаб олишингиз мумкин.
