Кун мавзуси: Samsung Galaxy Note 7 расман “ўлдирилди”
Бугун Жанубий Кореянинг Samsung Electronics компанияси шу йилнинг август ойида глобал тақдимоти ўтказилган Galaxy Note 7 фаблетини ишлаб чиқаришни бутунлай тўхтатди. Бу ҳақда The Verge нашри маълумот тарқатган.
“Мижозлармизнинг саломатлигини барча нарсадан устун қўйган равишда, Galaxy Note 7 моделининг савдоси ва ишлаб чиқаришини тўхтатишга қарор қилдик”, – дейилади компания баённомасида.
Кеча, 10 октябрь куни, Samsung Electronics мазкур моделни ишлаб чиқаришни вақтинча тўхтатишини маълум қилган эди.
Компания бутун дунё бўйлаб расман сотилган барча Galaxy Note 7 смартфонларини қайтариб олади. Шу мақсадда Samsung Electronics мазкур фаблетдан фойдаланаётган барча истеъмолчилардан қурилмани дарҳол ўчириб, уни харид қилган сотув нуқтасига қайтаришни сўрамоқда.
Ўтган ойда Жанубий Корея фирмаси жаҳон бўйлаб ушбу маркадаги смартфонларни алмаштиришни бошлаган эди. Бироқ янги партиядаги қурилмаларда ҳам аввалги носозлик аниқланиб, ёниб кетиш ҳолатлари қайд этилди.
Reuters сайтининг маълум қилишича, халқаро миқёсда барча Galaxy Note 7 смартфонларини қайтариб олиш ва ишлаб чиқаришни тўхтатиш натижасида компания 17 млрд АҚШ доллари миқдорида молиявий зарар кўриши мумкин.
