LG навбатдаги кучли флагманни тақдим қилди

LG навбатдаги кучли флагманни тақдим қилди

Гарчи, MWC 2018 анжуманининг расмий очилиши эртага мўлжалланган бўлса ҳам, жаҳон IT-технологиялари ишлаб чиқарувчилари аллақачон янги технология ва маҳсулотлари билан барчани хурсанд қилишга улгурмоқдалар.

Alcatel брендидан сўнг, таниқли LG компанияси ҳам ўзининг флагманини тақдим қилди. Мобил бизнесда бир қатор муаммоларга дуч келаётган компаниянинг бу галги смартфон модели янги жиҳатларга бой бўлган.

Барселонада тақдим этилган янги модел LG V30'нинг "меросхўри" бўлиб, бу галги телефон "сунъий идрок" хусусиятларига эга бўлган. Шу билан бирга, корпус янги ранг ҳамда каттароқ хотира билан таъминланган.

LG V30S ThinQ деб номланувчи флагман 6 гигабайтли тезкор ҳамда 256 гигабайтли доимий хотираси, марокашча мовий ва платинача кулранг тусдаги корпуси билан LG V30'дан ажралиб туради.

Дастурий таъминотда эса "сунъий ақл" флагманни ниҳоятда таассуротли жиҳатлар билан бойитган. Телефон "Vision AI" ва "Voice AI" деб номланувчи "ақлли дастурлар" асосида янги функцияларга эга бўлган.

"Vision AI" ўзида 3 жиҳатни жам қилган:

QLens — суратдаги объектлар хусусида қўшимча маълумот олиш, уларни излаш, хусусан интернет дўконлардан излаш ҳамда QR‑сканерларни аниқлаш.

AI Cam — объектни аниқлайди ва суратга олишни автоматик равишда ишга тушириб, максимал даражада ёрқин сурат олади. Камера иловасида "озиқ-овқат", "пейзаж", "гул", "портрет", "уй ҳайвонлари" каби режимлар мавжуд.

Bright — "сунъий ақл" алгоритмлари ёруғлик паст шароитда сурат сифатини яхшилаш учун зарур ёруғлик миқдорини қўшади.

Voice AI функциялари ёрдамида эса смартфонга овозли буйруқ бериш мумкин. Бу жиҳат фақат LG V30S ThinQ моделида мавжуд. Мисол учун, унинг ёрдамида секинлаштирилган видео ёзиш, сурат олиш ва камерага бошқа вазифалар буюриш мумкин.

Эълон қилинишича, бундай "сунъий ақл" алгоритмларини ишлаб чиқариш учун дастурчиларга бир йил вақт керак бўлган. Келажакда улар компаниянинг бошқа девайсларига ҳам татбиқ қилинади.

Смартфон 6 дюймли, OLED матрицали ва QuadHD (2880 x 1440 пикселли) дисплей билан таъминланган. FullVision экраннинг томонлар нисбати 18: 9 стандартида.

Qualcomm Snapdragon 835 процессори смартфоннинг тезкор ва самарали ишлаши учун хизмат қилади. 

Бош камера қўш модулга эга бўлган: 16 Мп ва 13 Мп. Уларга энг яхши -- f/1.6 ва f/1.9 ҳажмидаги ёруғлик линзалари ўрнатилган. Айтиш керакки, бу смартфон камерасида f/1.6 ҳажмли диафрагма ўрнатилган илк флагман. Бу линза камерага кўпроқ ёруғлик ўтказиш имконини беради.

LG V30S ThinQ аккумулятори 3300 мА соат ток сиғимини жам қилади. Батареяни симсиз қувватлаш мумкин. Смартфонда Bluetooth 5 стандарти жорий қилинган. IP68 ҳимоя гувоҳномасини олган корпус Corning Gorilla Glass 5 шишаси билан қопланган.

Девайснинг  1000 АҚШ долларидан сотувга чиқарилиши кутилмоқда.

 

Хабарларни тез ва осон ўқиш учун Андроид иловамизни сақлаб олинг.