Малайзияда смартфондан ток уриши оқибатида илк ўлим кузатилди
Малайзиянинг Kosmo янгиликлар сайтининг ёзишича, Куала Лумпур шаҳри яқинида яшовчи Суҳана Муҳаммад исмли 30 ёшли аёл 15 апрель куни кечки 11.30 да розеткага уланган, қувват олаётган смартфонда сўзлашиб турганида уни электр токи урган ва аёл ҳодиса жойида вафот этган.
Марҳумнинг эри, полиция ходими Ража Асрининг маълум қилишича, у кутилмаган шовқиндан уйғониб кетган ва турмуш ўртоғини зудлик билан шифохонага келтирган.
Кўпчилик уни ярим оқшом телефонда суҳбатлашишда айблаши мумкин. Гап шундаки, ўша куни Суҳана таваллуд кунини нишонлаётган ва дўстларидан табрикларни қабул қилаётган бўлган.
Бу Малайзияда смарфтонни қувватлаш натижасида электр токи уриши билан боғлиқ содир бўлган илк ўлим ҳолати бўлиб, фожиадан бутун мамлакат саросимага тушган. Ҳозирча смартфон тури ва қувватлаш мосламаси тўғрисида бирор аниқлик маълум қилинмаган.
Смартфон қувват тоши, яъни аккумуляторларнинг вақт ўтиши билан эскириш ва портлаш ҳолатлари, улар сабаб юзага келган ёнғинлар ҳам кўп кузатилади. Аммо унинг одам ҳаётига дахл қилиши камдан-кам бўлса ҳам кузатилади. Айниқса, сўнгги йилларда бу каби ҳодисалар сони кўпаймоқда.
2013 йилнинг июль ойида Хитойда розеткадан қувват олаётган iPhone 5 смартфонида мулоқот қилаётган Ма Айлун исмли аёл ҳам ток уриши оқибатида ҳалок бўлганлиги қайд этилган. Синьхуа ахборот агентлигининг маълум қилишича, мазкур ҳодисага сабаб бўлган айфон ҳам, қувватлантириш мосламаси ҳам асл (оригинал) бўлган.
Бу воқеадан бир неча ой ўтиб, шу йилнинг ноябрь ойида эса тайландлик яна бир айфон фойдаланувчиси қувват олаётган iPhone 4S смартфонини қучоғида олиб ётганида ток уришидан вафот этади.
2015 йилнинг февралида эса iPhone смартфонидан ток уриши билан боғлиқ ўлим ҳолати Россияда қайд этилган. Бу фожиа қувват олаётган смартфоннинг ваннага тушиб кетиши оқибатида содир бўлган.
Мутахассислар смартфон қувват олаётганида ундан фойдаланмаслик, бундай ҳолатда уни алоҳида жойда қувватлантириш, болаларни қўли етмайдиган жойда сақлаш, мобиль қурилма қувват олаётганида ундан сўзлашмаслик кераклигини қайта-қайта таъкидлаб келишади.
