“Малика”да YotaPhone 2 моделини 1,3 млн сўмга харид қилиш мумкин

Mobinfo.uz нашрида берилган хабарга кўра,  Россияда ишлаб чиқилган YotaPhone 2 модели “Малика” савдо-расталарида 1,3 миллон сўм нархида сотувга чиқарилган.  Модель бошқа маркадаги смартфонлардан иккиталик дисплейи билан ажралиб туради. Агар олд рангли экран смартфонга хос асосий вазифаларни бажарса, e-Ink технологияси базасида яратилган орқа оқ-қора экранда аналог соатларни ўрнатиш ёки электрон китобларни ўқиш мумкин.

YotaPhone 2 моделига 4,7 дюймли иккита экран ўрнатилган: 960 х 540 пикселли e-Ink экран смартфоннинг орқасида жойлашган, олд тарафда эса Super AMOLED матрицасидаги Full HD экран мавжуд.

Смартфон Android 4.4 KitKat версиясида ишлайди, аммо тез орада Android Lollipop версиясига янгилаш режалаштирилган. YotaPhone 2 гаджети 4 ядроли, такт частотаси 2,2 ГГц бўлган Snapdragon 800 процессорида ишлайди. Унга 8 МПли асосий ва 2,1 МПли олд камера ўрнатилган. Шунингдек, Wi-Fi, LTE ва NFC модуллари ҳам кўзда тутилган. Смартфон сиғими 2500 мА/ст бўлган батареядан қувватланади. Қалинлиги 9 мм атрофида.

Тошкент шаҳридаги “Флешка” савдо марказида мазкур смартфонни 1,3 миллион сўмга сотиб олиш мумкин.

Изоҳ:  «Малика» дўконларидан ушбу моделни юқорида кўрсатилган нарх билан сотиб олишингизга  «Terabayt.Uz» сайти кафолат бермайди.