Meizu 15 Plus: суратлари ва нархи эълон қилинди
Сўнгги кунларда интернет тармоғида Meizu 15 Plus флагманининг янги рендер суратлари тарқалмоқда.
Meizu компаниянинг 15 йиллиги муносабати билан тақдим қилинаётган Meizu 15 Plus платформасида Snapdragon 845 ёки Exynos 8895 чипсетлари, 6 гигабайтли тезкор ва 128 гигабайтли доимий хотира бўлади. Флагман 6,01 дюймли ёрқин экран билан таъминланади.
Кеча эълон қилинган навбатдаги фотосуратда бу телефон аппаратининг нархи ҳам кўрсатилган. Унга кўра, хитойлик бўлажак кучли смартфон 530 АҚШ долларидан сотувга чиқарилади.
Суратлардан келиб чиқиб айтадиган бўлсак, флагман корпуси металл ва шишадан тайёрланади. Бу технология компания учун янгилик эмас. Meizu 15 Plus орқа панелида қўш сенсорли, вертикал ҳолатда жойлашган бош камера мавжуд.
Экспертларнинг фикрича, бармоқ изи сканери корпуснинг ўнг ёнидан ўрин эгаллайди. Meizu M6S смартфонида илк маротаба бундай ечим тақдим қилинган эди. Умуман олганда, Meizu 15 Plus ўта юпқа ромларга эга бўлади. Унинг дисплейи қайрилма бурчакли дизайнда ишланади.
Шу боис ҳам у кўринишдан iPhone X'ни эслатиб юбориши мумкин. Фақат хитойлик телефон пешонасида сенсорлар учун ўйиқ жой бўлмайди. Шунингдек, аудио қулоқчинлар учун 3,5-миллиметрли порт сақлаб қолинади.
Meizu 15 Plus флагманининг шу йилнинг мартида сотувга чиқарилиши кутилмоқда. У билан бирга унинг соддароқ талқини бўлган Meizu 15 ҳам тақдим қилинади. Meizu 15 Plus компаниянинг бош флагманига айланади.
