Microsoft таълимий Surface Laptop гаджетини тақдим қилди

Microsoft таълимий Surface Laptop гаджетини тақдим қилди

Microsoft компанияси 2 май куни Нью-Йоркда Surface туркумига кирувчи янги ноутбукини тақдим қилди. 13.5 дюймли экранга эга гаджет асосан таълим олишга мўлжалланган. Surface Laptop девайси бозордаги Chromebook турига мансуб гаджетлари билан рақобат қилади. Бу ноутбук планшетга айланмайдиган илк Surface компютери ҳисобланади. Аввал тақдим этилган Surface’лардан фарқли равишда, мазкур лаптопнинг корпуси букланувчи механизмга эга эмас ва кўринишидан анъанавий ноутбукни эслатади.

Пиксел сиғими бир оз камайганини ҳисобга олмаганда, янги Surface аввалги оиладошларига ўхшаб кетади. Жумладан, 13.5 дюймли дисплейнинг пикселлар сиғими Full HD (1080p). ‘PixelSense’ технологиясидаги сенсор дисплейдан бир вақтнинг ўзидан бир неча киши фойдаланиши мумкин. Ноутбук Surface Pen стилусини қўллаб-қувватлайди. Ноутбук Windows 10 S операцион тизимида фаолият олиб боради.

Девайс кучли Core i7 ёки Core i5 процессорига,1 терабайт сиғимли доимий хотирага, тўлиқ қувват билан 14.5 соатга етадиган аккумуляторга, Dolby Premium аудио тизимига эга. Surface Laptop корпусида 1 та USB-A порти мавжуд.

Металл корпусли лаптопнинг дизайни жуда ҳашамдор. Microsoft’нинг маълум қилишича, корпус қалинлиги 14,5 мм ҳамда вазни 1,5 кг бўлган бу ноутбук Apple ноутбукларидан юпқа ва енгил, шунингдек 13 дюймли MacBook Pro’дан 50% тезроқ ишлайди. Шунингдек, 14.5 соатга етадиган “қувват тоши” билан ҳам рақибини мағлуб қилади. Шу билан бирга, Microsoft қурилмасида қувватни тежайдиган махсус режимни ҳам татбиқ қилган.

Surface Laptop кутилганидан арзон, яъни $999 (Core i5, 4 ГБ “оперативка”, 128 гигабайтли доимий хотира) доллардан бошлаб сотилмоқда. Унга аввалдан буюртма берганлар ноутбукни 15 июндан бошлаб оладилар. Гарчи, у Surface Book’дан арзон бўлса ҳам, техник жиҳатлари ҳам шунга яраша.

Terabayt.uz сайтининг видеолари: Youtube'даги каналимизда!