MIUI 9.5 Xiaomi смартфонларини ишдан чиқармоқда

MIUI 9.5 Xiaomi смартфонларини ишдан чиқармоқда

Xiaomi компанияси бир фурсат аввал ўзининг смартфонлари учун MIUI 9.5 прошивкасини эълон қилган эди. Шу кунларда мобил алоқа қурилмасига мазкур янгиланишни юклаб олган фойдаланувчилар тизимнинг фаолиятидан шикоят қилмоқдалар.

Айниқса, Mi MIX 2 ҳамда Mi 6 флагман моделларида MIUI 9.5 тизими ўрнатилганидан сўнг операцион тизимда носозлик келиб чиққан. Бу тўғрида интернет тармоғидаги Xiaomi форумида ҳам маълум қилинган.

MIUI 9.5 янгиланишини юклаб олган смартфон эгаларининг сўзларига кўра, янги тизим ўрнатилганидан сўнг мобил қурилмаларда огоҳлантириш ва мессенжерлардан хабарлар келмай қолган, смартфонларнинг қуввати тез тугаб, мобил қурилма фаолият чоғида қизиб кетган.

Хитойлик корпорация мазкур носозликни тасдиқлаб, бундан халос бўлишнинг йўлини маълум қилган. Xiaomi мутахассисларига кўра, фойдаланувчилар Google Framework ҳамда Google Mobile Services хизматларини вақтинча ўчириб қўйсалар, носозлик бартараф қилинади ва компания тез орада бу муаммога ечим топади.

Шу боис, аний вақтда MIUI 9.5 тизимини юклаб олган фойдаланувчилар Gmail, YouTube, Google Play ва бошқа хизматларни ўчириб қўймоқдалар. Прошивка билан боғлиқ носозлик америкалик Google корпорацияси билан боғлиқ.

Шу билан бирга, айрим фойдаланувчиларнинг сўзларига кўра, MIUI 9.5 янгиланишидан сўнг смартфонларда будильник иловаси яхши ишламай қолган. Xiaomi бу муаммони ҳам Google Framework ҳамда Google Mobile Services хизматларининг нотўғри ишлаши билан изоҳлаган.

Xiaomi бундай муаммоларни тезкор ҳал қилиши билан ном қозонган. Шундай экан, хавотирга ўрин йўқ.

Terabayt.uz сайтининг видеолари: Youtube'даги каналимизда!