Мобил интернет: янги рейтинг эълон қилинди
OpenSignal ресурси энг яхши мобил интернетга эга бўлган мамлакатлар рейтингини эълон қилди. Ресурс фойдаланувчиларнинг смартфонларига ўрнатилган тегишли илова орқали (Android ва iPhone) дунёдаги турли ҳудудларда мобил тармоқнинг тезлиги, қоплами ва барқарорлигини текширади.
Шу ойда эълон қилинган ҳисобот жорий йилнинг май-июл ойларида тахминан 800 000 та фойдаланувчиларнинг телефонларидаги илова ёрдамида олинган кўрсаткичлар асосида 95 та мамлакат мисолида тайёрланган. Унда 3G/4G сигналларининг мавжудлиги, тармоққа уланишга сарфланадиган вақт, юклаш ва юклаб олиш тезликлари каби параметрлар ҳисобга олинади. Бундан ташқари, илова фойдаланувчиларнинг Wi-Fi ёки мобил интернетдан фойдаланиш вақтини ҳам кузатиб боради.
Ҳисоботга кўра, рейтингда иштирок этган 95 та мамлакатдан 93 тасида 3G қоплами мавжуд бўлиб, фойдаланувчиларнинг аксарияти 75% вақтни айнан мана шу стандартга уланган ҳолда ўтказар экан.
Мобил тармоқ яхши ривожланган мамлакатлар – Жанубий Корея, Япония, Исроил, Сингапур ва Финландиядаги фойдаланувчиларга 93% ҳолатда 3G ва ундан юқори стандартларга уланиш таъминланган экан.
Албатта, мобил тармоқ қоплами ва ундаги тезлик бир-биридан фарқ қилади. Ресурс маълумотларига асосан Жанубий Корея секундига ўртача 41.34 мегабит тезлик билан рўйхатда етакчилик қилмоқда. Энг сифатсиз тезлик эса Афғонистонда қайд этилган – секундига 2.2 мегабит.
АҚШ секундига 12.34 мегабит тезлик билан Венгрия (26.15Mbps), Литва (21.47Mbps) ва Хитой (17.95Mbps) каби давлатлардан ортда қолмоқда.
Россия рўйхатда секундига 8.5 мегабит билан Қувайт, Чили, Перудан кейинги ўринни банд этган.
