Мобил трафикни тежаш учун Google’дан янги илова!

  •   DiMaX
  •  9186
  •  30.06.2017 17:53

Мобил трафикни тежаш учун Google’дан янги илова!

Кўпчилик мамлакатлар қатори, ўзимизда ҳам кўпчилик интернет фойдаланувчилари трафикни тежашга ҳаракат қилишади. Бироқ смартфонларда бу сал мушкулроқ – айрим иловалар биздан берухсат ўз-ўзини янгилайди, маълумотларни синхронлайди… Хуллас, мобил трафикнинг сарфини назорат қилишга, тежашга зарурат мавжуд. Бунда эса энди бизга Google’нинг янги – Triangle иловаси қўл келади.

Android  тизими учун ишлаб чиқилган Triangle иловаси нафақат мобил уланиш орқали маълумотлар узатишни назоратга олади, балки трафикни тежаш учун бир қанча жиҳозларни ҳам таклиф қилади.

Илованинг бош экранида трафикни сарфлаётган асосий дастурлар рўйхати чиқиб туради. Сукут бўйича смартфонингизда интернетга уланиш учун барча иловаларга рухсат берилган бўлади. Улардан айримларининг рухсатини чеклаш, умуман, трафикни тежаш учун Triangle’нинг пастки қисмидаги Data Saver переключателини фаоллаштириб қўйиш керак.

Тежамкорлик режимида мобил трафигингиздан фақат «оқ рўйхат»даги бир нечта илова ҳамда тизим хизматларигина фойдалана олади. Бошқа дастурларнинг интернетга рухсати чеклаб қўйилади; буни Triangle’да уларнинг номи ёнида пайдо бўлувчи қулфча белгисидан ҳам билиш мумкин.

Агарда сиз бу – ҳаракати чекланган иловалардан бирортасининг мобил интернетдан фойдаланишига рухсат бермоқчи бўлсангиз, иловада унинг номи устига босасиз. Пастга очилувчи менюдан унинг учун рухсатни қанча муддатга очмоқчи эканингизни танлайсиз.

Шунингдек, ҳар гал бирор илова мобил уланиш орқали маълумот алмашишга уринганида, Triangle’нинг қалқиб чиқувчи ойнаси пайдо бўлади, унда ҳам худди шу амални бажариб, унга қанча вақтга рухсат бериш ёки бермасликни ўзингиз ҳал қиласиз.

Айтиш керакки, Triangle ҳозирча синов босқичида, шу боис унинг турли моделдаги ёки ҳудуддаги қурилмаларга ўрнатилишида чекловлар бўлиши мумкин. Шу боис, агарда уни мана бу ҳавола ёрдамида Google Play’дан юклай олмасангиз, ушбу ҳавола орқали APK Mirror сайтига ўтиб, унинг APK форматидаги ўрнатилувчи файлини олиб ўрнатиш имкони мавжуд. Дарвоқе, илова Android 5.0 ва ундан кейинги тизим версияларида ишлайди.

Хўш, тежамкорликнинг янги имкониятидан ҳозироқ фойдалана бошлаймизми?

Хабарларни тез ва осон ўқиш учун Андроид иловамизни сақлаб олинг.