Mozilla Firefox браузери мессенжер хизматини тақдим этмоқда
Шу кунларда Mozilla компанияси Firefox браузерининг 41.0 рақамли янгиланган версияси яратилганини эълон қилди. Бу янгиликни Windows, Mac, Linux ва Android тизими фойдаланувчилари ишлатишлари мумкин.
Браузерда Firefox Hello номли тезкор хабар алмашиш тизими пайдо бўлгани унинг энг диққатга сазовор жиҳатидир. Дастурни ишлаб чиқувчилар “бевосита браузернинг ўзига жойланган хабарлашув хизмати мавжудлиги” билан бошқалардан ажралиб туришига омма эътиборини қаратишмоқда.
Шу кундан бошлаб Firefox фойдаланувчилари компьютер ва мобил қурилмалардан Hello тизими орқали тезкор хабар алмашишлари ва ҳатто видеоалоқа қилишлари мумкин.
Айтиб ўтиш керакки, янги версияда Firefox аккаунтингизга расм жойлаш, SVG векторли тасвирни фавикон сифатида жойлаш имконлари пайдо бўлди.
Firefox 41.0 версиясини истовчилар Firefox.com сайтидан юклаб олишлари, эски версия фойдаланувчилари эса янгилаб олишлари мумкин. Браузернинг андроид версиясини Google Play тармоқ магазинидан юклашингиз мумкин.
Қисқача маълумот. Mozilla Firefox браузери 2004 йилда Мозилла корпорацияси томонидан яратилган бўлиб, оммалашуви жиҳатдан жаҳонда учинчи ўринни эгаллайди. Германияда энг машҳур браузер ҳисобланади. Интерфейсида бир нечта қўшимча варақалар (вкладка), орфографик хатолaрни текшириш, қидирув тизимлари учун майдонча, юклаш менежери каби хизматлари мавжуд. Шунингдек, Mozilla Firefox энг кам хатоликка йўл қўювчи браузер ҳисобланади.
