Муддат тугади: Telegram’ни блоклаш учун судга ариза топширилди
Хабарингиз бор – Россия Федерациясининг Алоқа, ахборот технологиялари ва оммавий коммуникациялар соҳаси назорати бўйича федерал хизмати – Роскомнадзор мамлакат ҳудудида Telegram мессенжерининг фаолиятини тўхтатишни талаб қилиб чиққан. Аниқроғи, у мессенжернинг шифрлаш калитларини Россия Федерацияси федерал хавфсизлик хизмати (ФСБ)га беришини сўраган, бу талаб рад этилган тақдирда уни блоклашини айтган.
ЎҚИНГ: Telegram’ни блоклашмоқчи, вазият жиддий!
Ушбу масала бўйича можаролар давом этиб, кейинчалик Telegram компанияси мессенжернинг шифрлаш калитларини топшириш техник жиҳатдан имконсиз эканини айтган. Бунинг сабаби шундаки, мазкур калитлар бевосита миллионлаб фойдаланувчиларнинг ўз қурилмаларида сақланади, ёзишмалар эса қисмларга бўлиниб, турли мамлакатлардаги серверларга жойлаштирилган.
Хуллас, Telegram компаниясига берилган муддат 5 апрель куни ўз ниҳоясига етди. Бугун – 6 апрелда Роскомнадзор пойтахтнинг Таганск район судига мурожаат этиб, Россия ҳудудида мессенжерни блоклаш талаби акс этган аризани топширган. Аризага кўра, Telegram Россия Федерацияси Олий судининг қарорига бефарқлик қилиб, фойдаланувчилар хабарларининг шифр калитларини ФСБга топширмаган.
Telegram айни дамда мамлакат Олий суди қарори юзасидан Инсон ҳуқуқлари бўйича Европа судига шикоят жўнатган. Афтидан, бу чора Россияда мессенжернинг блокланишига тўсқинлик қила олмайди, дейишмоқда кузатувчилар.
Лекин ташвишланишга ҳожат йўқ – агарда Telegram блокланса ҳам, унга iOS ёки Android-смартфондан кириш йўлларини мана бу, компьютер ва ноутбуклар орқали кириш усулларини эса мана бу ҳаволалар орқали ўтиб, ўрганиб олишингиз мумкин.
ЎҚИНГ: Telegram фаолияти тикланди. Унинг ишламай қолишида Роскомнадзорнинг айби борми?
