MWC 2017: LG, Sony, Samsung, Huawei, ZTE, HTC, Nokia’дан янги смартфонлар

27 февралдан 2 мартга қадар Барселонада ўтадиган анъанавий Жаҳон Мобиль Конгресси технология ишлаб чиқарувчиларининг янги инновациялари билан янада қизғин тус олиши кутилмоқда. Жумладан, янги смартфонлар тақдимотлари доимгидек мобиль қурилмалар оламига келажакка хос илғор жиҳатлар билан бирга тақдим этилади. Қуйида ушбу анжуманда намойиш этилиши кутилаётган янги смартфонлар жамланмаси ҳақидаги бирламчи маълумотларни диққатингизга ҳавола қиламиз.

LG

2016 йилда ўтказилган Жаҳон Мобиль Конгрессида тақдим этилган G5 кутилган даражада оммалашмади. Турли-туман модул ва интерактив қисмлардан иборат смартфон LG’га омад келтирмади. Шу сабабли, компания G6 ҳақидаги қизғин миш-мишлар билан ҳамманинг диққатини тортишга уринмоқда. Энг катта янгилик – LG G6 олдинги гаджетдан тубдан фарқ қилади ва қўшимча қисмлардан иборат бўлмайди. Унда 4 каналли, 32 битли янги рақамли-аналог ўзгартиргич ўрнатилган. Бу эса юқори сифатли аудио тизимни англатади.

G6 бошқа флагманлар сингари қўш камерага эга бўлади. LG томонидан унинг йирик экранга эга бўлиши ҳам тасдиқланган. Маълум бўлишича, экран томонларининг нисбати 18:9’га тенг (бугунги аксарият флагманларда бу кўрсаткич 16:9’га тенг). Баъзи бир манбааларда девайснинг Snapdragon 821 процессорида ишлаши айтилган. Ваҳоланки, 2017 йилги аксарият илғор смарфтонларга янада кучлироқ Snapdragon 835 процессори ўрнатилмоқда. Аммо, бу камчиликни батамом ёпиб кетадиган катта янгилик бор – маълум бўлишича, G6 Google’нинг Assistant виртуал ёрдамчисига эга илк таниқли бренд бўлади. Бунгача бу тизим Google’нинг Pixel смартфонларига ўрнатилган. Кореялик ишлаб чиқарувчининг V20 гаджети 2016 йилда Android 7.0 Nougat операцион тизимига эга бўлган илк “ақлли телефон” сифатида машҳур бўлган эди.

LG G6 халқаро смартфон бозорига $650 доллардан сотувга чиқарилиши кутилмоқда.

Sony Xperia X2, XZ 2 ва бошқалар

Sony компаниясининг MWC 2017’да биратўла 5 та смартфон намойиш этилиши кутилмоқда. Улардан 2 таси юқори синф флагманлари бўлади. Яъни, Sony Xperia XZ 2 ва Sony Xperia X2 гаджетларининг тақдим этилиши ҳам кутилмоқда. Sony Xperia X2 халқаро бозорга 550 АҚШ долларидан сотувга чиқарилади.

Миш-мишларга кўра Sony’нинг бўлажак “байроқдори” 5.5 дюймли бўлади. Унинг экрани ўта илғор – 4K сиғимли бўлиши кутилмоқда. Смартфон Snapdragon 835 процессори, 4 ГБ ёки 6 ГБ тезкор хотира билан таъминланади. Sony гаджетлардан яна бири  5.5 дюймли QHD экранли бўлиб, у  4 ГБ тезкор хотира ва Snapdragon 835 ёки Snapdragon 653 процессорлираги эга бўлади.

Шунингдек, япониялик ишлаб чиқарувчи 5.2 дюймли, сиғими HD (1080p), 4 ГБ тезкор ва 64 ГБ доимий хотирага, 23 МП бош камера ва 16 МП олд камерага эга смартфонни ҳам намойиш этиши кутилмоқда.

Samsung

Бу йил Samsung учун ҳам синовли бўлади. Компания жаҳон смартфон бозоридаги нуфузини қайтариб, дунёнинг пешқадам смартфонсозига айланиш учун яна тинимсиз курашади. Компания навбатдаги Galaxy S8 смартфонини Барселонада эмас, бир оз кейин намойиш қилмоқчи. Ҳозирча эса бу флагман тўғрисидаги қисқа 20 сониялик ролик билан унга бўлган қизиқишни янада оширмоқчи. Тахминларга кўра, Galaxy S8’нинг арзон талыини 885 АҚШ доллари, юқори талқини эса 943 доллардан сотувга чиқарилади.

Кореялик IT-гигант Барселонага келган технология ихлосмандларини янги, аввалги йилги Galaxy Tab S2 планшетининг “меросхўри” бўлмиш Tab S3 планшети билан мамнун қилмоқчи. Маълумотларга кўра, девайс 9.7 дюймли Super AMOLED экран ва Snapdragon 820, яъни ўтган йилги илғор процессорга, S Pen рақамли қаламчасига эга бўлади.

Шунингдек, Samsung Galaxy Book номли яна бир планшетни намойиш қилади. Унинг Windows 10 тизимида ишлаши айтилмоқда. Планшетнинг Galaxy TabPro S каби  Intel’нинг Kaby Lake i5 процессори билан таъмин қилиниши ҳақида маълумотлар бор.

Samsung, шунингдек синов тариқасида намойиш этиш учун C-Lab,  AR ва VR тизимлари, персонал компьютерда ишлаш имконини берувчи электрон кўзойнаклари каби янги технологияларни олиб келишини маълум қилган.

Huawei

Huawei компанияси нуфузли анжуманда P10 смартфонини тақдим этади. Тўлиқ металл корпус ва анъанавий Leica брендининг қўш камерали объективларига эга гаджетнинг Kirin 960 процессорида ишлаши айтилмоқда.

Ушбу суратда  «Жаҳоннинг сен тўғрингдаги қарашини ўзгартир» жумласи Huawei P10 смартфонининг шиори сифатида келтирилган. Афтидан, смартфонда 2 та олд камера бўлади.

Таниқли IT-таҳлилчи Эван Бласснинг ёзишича, смартфоннинг орқа панелидаги бармоқ излари сканери олдинга, экран қуйисига кўчирилган. P10  4 ёки 6 ГБ тезкор хотира, 32 ва 128 доимий хотира билан таъминланади. Унинг янада кенгроқ талқини бўлган P10 Plus’нинг S7 Edge каби икки ёнга қайрилган экранлари бўлиши айтилмоқда.

Шу билан бирга, Huawei Android Wear 2.0 номли ақлли соатни ҳам намойиш қилиш кутилмоқда. Спорт билан шуғулланишга мўлжалланган соат Samsung’нинг Gear S3 Frontier ҳамда LG Watch Sport’га ўхшаб кетади.

8 ГБ оператив хотира ва 256 ГБ доимий хотирага эга Huawei P10 Plus алоқа воситасининг 850 АҚШ долларидан сотувга чиқарилиши тахмин қилинмоқда.

ZTE

ZTE қанчалик сирли бўлишга уринмасин, унинг Испанияга ишчи номи Gigabit phone бўлган смартфон билан ташриф буюриши тилларга тушиб бўлди. Унинг замонамизнинг интернетга энг тезкор уланувчи смартфони бўлиши, унда 360 даражали видеоларни, 4K видео тасвирларни онлайн кўриш мумкинлиги айтилмоқда.  Бешинчи алоқа авлоди смартфони интернетга секундига 1 Гбит тезлигида уланади. Бир сўз илан айтганда, Gigabit phone алоқанинг ҳозирги 4-тармоғи эмас, кейинги йилдан оммалашадиган 5G тармоғида ишлашга мўлжалланган.

HTC

Тайванлик ишлаб чиқарувчининг янги – HTC U Ultra номли смартфонни тайёрлаётгани айтилган эди. Ҳозирча Барселонада унинг тақдим этилиши маълум эмас. Миш-мишларга кўра, девайс 5.5 дюймли QHD рамкасиз экранга, металл корпус ва Snapdragon 835 процессорига, 12MP бош камера, 3700 мА соат ток сиғимли аккумуляторга эга бўлади.

Шунингдек, компаниянинг яна бир HTC 11 “ақлли телефони” тўғрисида ҳам гап-сўзлар мавжуд. Унинг 8 ГБ ички ва 256 ГБ доимий хотира, икки ёнга қайрилган экран билан таъминланиши айтилмоқда. Ундаги ‘Sense Touch’ технологияси металл рамка орқали ҳам телефонга буйруқ бериш имконини яратади. Мисол учун, сурат очиш, овозни ёки ёруғликни сенсор рамка орқали созлаш мумкин.

Смартфонлар Европада 685-750 АҚШ долларидан сотилиш тўғрисида маълумотлар бор.

Nokia

Nokia MWC 2017’га ўзининг янги 4 та смартфон моделларини олиб келади. Бу эса компаниянинг афсонавий “Нокиа” номини “тирилтириш” учун куйиб пишаётганидан далолат беради. Айтиш керакки, яқиндагина Хитойда тақдим этилган Nokia 6 бир неча дақиқа ичида сотилиб кетган эди.

Nokia 3 ҳамёнбоп нархдаги девайс бўлиб, пластик корпусли бўлади. Нисбатан илғор Nokia 5 металл корпусли бўлади. Nokia 8 эса 24 мегапикселли бош камера ва Snapdragon 835 процессорига эга бўлади.

Инсайдерлар томонидан Nokia 8’нинг 464 АҚШ долларидан сотилиши маълум қилинган.

Энг қизиғи, афсонавий Nokia 3310’нинг Барселонада қайта тақдим этилиши ҳамманинг диққат-марказидаги хабар бўлиб турибди.