Ниҳоят, Samsung ромсиз Galaxy A6 ва A6+ смартфонларини расман тақдим этди
Кейинги пайтларда энг кўп тилга олинган ва тақдимоти кутилган смартфонлар – жанубий кореялик гигантнинг Galaxy A6 ҳамда Galaxy A6+ моделларидир. Ниҳоят, Samsung ушбу ўрта нархли гаджетларнинг расмий намойишини ўтказди.
ЎҚИНГ: Бунақаси бўлмаган: Galaxy A6 смартфонидан аввал унинг видеоқўлланмаси чиқди!
Galaxy A сериясининг бу икки янги модели яхши техник хусусиятларга эга. Уларнинг асосий ўзига хослиги – томонларининг ўзаро нисбати ноодатий бўлган катта Super AMOLED-дисплейи, операцион тизимнинг замонавий – Android 8 версияси ҳамда NFC модулига эга эканлигидир.
Мазкур икки модел ташқи кўринишидан ўзаро ўхшаб кетади, аммо муайян фарқлари мавжуд. Жумладан, корпус ўлчамлари тегишлича 149,9х70,8х7,7 ҳамда 160,2х75,7х7,9 миллиметрни ташкил этади. Улардан «кичкина»си 5,6 дюймлик дисплейга эга бўлса, «плюсли» талқинида экран диагонали 6 дюймга тенг. Ҳар иккаласининг ҳам экрани чўзинчоқ – томонлари ўзаро 18,5:9 нисбатда бўлиб, ён томонлари ромсиз.
Табиийки, Galaxy A6 ҳамда A6+ девайслари «ички дунёси»га кўра ҳам бир-биридан фарқ қилади. Биринчисининг процессори 1,6 ГГц такт частотасида ишлайди, Galaxy A6+ моделида эса бу кўрсаткич 1,8 ГГц.гача оширилган. Аккумуляторларининг ток сиғими ҳам ўзгача: Galaxy A6 смартфонида у 3000 мА/соатга тенг бўлса, унинг «акаси» 3500 мА/соатлик батарея билан «қуролланган».
ЎҚИНГ: Бунақаси бўлмаган: нақ 16000 мА/соатлик аккумуляторга эга смартфон!
Ҳар иккала смартфон орқа пеналида дактилоскопик датчик жойлашган. Улар Wi-Fi 802.11n (2,4 ва 5 ГГц) ҳамда Bluetooth 4.2 адаптерлари, microUSB портлари, LTE Cat.6 модеми ҳамда NFC модули билан таъминланган. Гаджетлар Dolby Atmos (фақат қулоқчин орқали тинглашда), Bixby Vision, Bixby Home, Bixby Reminder ҳамда Samsung Pay технологияларини қўллаб-қувватлайди.
Иккита янги смартфоннинг ташқи кўринишидаги фарқлар корпуснинг орқа қопқоғида кўпроқ намоён бўлади. Galaxy A6 орқа қопқоғида f/1.7 диафрагмали, 16 мегапикселли якка камера жойлашган, унинг олд камераси ҳам 16 мегапикселли, аммо f/1.9 диафрагмали. «Плюсли» янги смартфоннинг асосий камераси эса 16 ва 5 мегапикселли иккита объективни ўз ичига олган. Тағин бу қўшалоқ камера Live Focus режимини ҳам қўллаб-қувватлайди, яъни унда сурат олинганидан кейин ҳам боке эффектини созлаш мумкин. Galaxy A6+’нинг олд камераси янада кучли – у 24 мегапикселли селфилар олишга қодир!
ЎҚИНГ: Galaxy A6 ва Galaxy A6+: нархи ва техник жиҳатлари
Galaxy A6 ҳамда A6+ смартфонларининг асосий хусусиятлари Phone Arena нашри томонидан тайёрланган қуйидаги жадвалда акс эттирилган:
Samsung ҳозирча бу қурилмаларнинг нархларини маълум қилгани йўқ, фақат улар май ойидаёқ сотувга чиқарилиши айтилган. Жанубий кореялик техногигантнинг бошқа моделлардаги кўплаб смартфонларига эса Ўзбекистонда ҳам расмий буюртма бериш мумкин.
