Nike ўзи боғланадиган кроссовкаларни ноябрь охирида сотувга чиқаради
Хайди Бургетт, Nike компанияснинг PR-директори ўзи боғланадиган HyperAdapt 1.0 кроссовкаларининг сотувга чиқиш санасини маълум қилди. Кроссовкалар 28-ноябрдан бошлаб АҚШда сотувга чиқарилади.
Боғичлари ўзи боғланадиган мазкур модель шу йилнинг баҳорида компания томонидан намойиш этилганди. Таъкидлаш керак, компания мазкур ғояни амалга ошириш учун бир неча йил ҳаракат қилган.
Nike 2015 йилда “Келажакка қайтиб 2” фильмида Марти Макфлай ролини ижро этган Майкл Джей Фоксга (Michael J. Fox) Nike Mag русумидаги кроссовкаларни совға қилган эди. 2011 йилда компания чегараланган миқдорда Nike Mag кроссовкаларининг репликаларини ҳам чиқарган эди, бироқ улар фильдаги оригиналга ташқи тарафдан ўхшаш бўлиб, боғичлари ўзи боғланмас эди. Аукционлар орқали 1510 жуфт Nike Magкроссовкалари сотилган.
Nike Mag кроссовкасидан фарқли ўлароқ, HyperAdapt 1.0 янада замонавий дизайнда яратилган, автоном тарзда боғичларни назорат қилиш функциясига эга ва ялпи ишлаб чиқаришга мўлжалланган. Фойдаланувчилар тўпиқ қисмидаги сенсорга қаттиқроқ босганда, боғичлар тортилади. Боғичлар зичлигини ён тарафдаги тугмалар ёрдамида бошқариш мумкин.
Боғичларни автоном бошқариш тизими 3 соатли зарядлашдан сўнг 2 ҳафта давомида ишлайди. Батареядаги қувватнинг камлиги ҳақида пошнадаги светодиодлар хабар беради.
