Nokia 150 HMD Global ишлаб чиқарган илк телефонга айланди
Бундан бир неча кун аввал сайтимизда 2017 йилда Nokia бренди яна смартфонлар бозорига қайтиши расман тақдиқлангани тўғрисида хабар ёзган эдик Афсонавий марканинг янги смартфонлари февраль ойида Барселонада ўтказиладиган MWC кўргазмасида намойиш этилиши мумкин.
Бироқ Nokia бренди остидаги мобил қурилмаларни ишлаб чиқариш ҳуқуқига эга бўлган HMD Global компанияси ушбу кўргазмани кутиб ўтирмай ўзининг мазкур марка остидаги илк телефонини омма эътиборига ҳавола этди, деб хабар бермоқда 4PDA. Бироқ бир нарсага эътибор бериш керак: бу модель смартфон эмас, балки оддий тугмали телефондир.
Nokia 150 моделининг корпуси поликарбонатдан ишланган. Унга 2,4 дюймли аниқлиги 320х240 бўлган экран, механик клавиатура, VGA-камера, светодиодли чақноқ ва мультимедиа карнайи ўрнатилган. Аккумуляторининг сиғими – 1020 мА/соат. Nokia Series 30+ дастурида ишлайди.
Модель бир ва иккита SIM-картали версияларда сотилади, нархи 26 доллар атрофида бўлиши маълум қилинган.
