Nokia 5 ва Nokia 3 Россияда сотувга чиқди

Россия дўконларида Nokia 5 ҳамда Nokia 3 смартфонларининг савдоси расман бошланди. Nokia 6 эса шу ойнинг сўнгги санасида сотувга чиқарилади, дея хабар беради Hi-Tech Mail.Ru.

Хабарда айтилишича, Nokia 5 учун тавсия этилган чакана нарх 12 990 рублни, Nokia 3 учун эса – 9 990 рублни ташкил этмоқда. Nokia 6 бўлса 30 июнь куни, 15 990 рубль нархида савдога чиқарилади.

Ритейлерларнинг гувоҳлик беришларича, Nokia смартфонларининг янги туркумига олдиндан буюртма бериш ҳажми 2017 йилги ўрта нарх сегментидаги бошқа барча смартфонларга бўлган талабдан ошиб кетган.

Шунингдек, олдиндан берилаётган буюртмаларнинг дастлабки таҳлилига кўра, харидорлар энг кўп Nokia 6 (ҳали савдога қўйилмаган) моделига қизиқиш билдиришмоқда. Мижозларнинг 52 фоизи айни шу гаджетга буюртма бераётир. Ундан кейинги ўринда Nokia 5 бўлса, энг кам қизиқиш билдирилаётган телефон Nokia 3 бўлмоқда.

Харидорлар кўпроқ қора рангли смартфонларга буюртма беришмоқда – 51 фоиз. Мижозларнинг 28 фоизи эса кўк рангли девайсларни харид қилиш иштиёқидалар.

Эслатиб ўтамиз, Nokia’нинг мазкур учта ва Nokia 8 моделлари MWC 2017 кўргазмасида тақдим этилган эди.