Nokia 7+’нинг илк расмий суратларини томоша қиламиз

MWC 2018 кўргазмасига саноқли кунлар қолганида, унда тақдим этиладиган қурилмаларнинг расмий расмлари ҳам тарқала бошлади. HMD Global компанияси мазкур тадбирда ҳамёнбоп Nokia 1, ўрта нархли Nokia 7+ смартфонлари ҳамда Nokia 9 флагманини намойиш этмоқчи.

ЎҚИНГ: Энг арзон Nokia 1 ҳамда илк ромсиз Nokia 7+ суратлари ва жиҳатлари

Булар орасидан Nokia 7+ моделининг расмий суратлари эълон қилинди, у ўтган йилги Nokia 7 смартфонининг сал каттароқ ва яхшиланган версиясидир. Ушбу «аждод»идан унга фақатгина дизайни мерос қолган – металл корпус, орқа қопқоғи эса шишадан. Олд томонида экран ромлари бироз юпқалашган, орқасида эса асосий камера қўш объективли бўлган.

Nokia 7+ экранининг ўлчами – диагоналига 6 дюйм, трендга мос тарзда унинг томонларини ўзаро 18:9 нисбатда қилишган. Дисплейнинг пикселлар сиғими Full HD+ форматида, яъни 2160×1080 пикселли. 12 ҳамда 13 мегапикселлик иккита модулни ўзида жамлаган бош камера эса Carl Zeiss оптикасига эга. У оптик барқарорлаштириш ҳамда тасвирни икки карра катталаштириш функцияларига эга.

Мазкур девайс Qualcomm’нинг ўрта нархли смартфонларга мослаб ишлаб чиқарган Snapdragon 660 процессори базасида ишлайди. Тезкор хотираси 4, доимий хотираси эса 64 гигабайтлик бўлиши айтилмоқда.

ЎҚИНГ: Nokia’нинг тақдим этилмаган смартфони илк «жонли» суратда!