Nokia 8'нинг нархи, тақдимот куни маълум бўлди
HMD Global компанияси ўзининг навбатдаги матбуот анжуманига оммавий ахборот воситалари вакилларини таклиф қилишни бошлади. Бу тадбирда компания Nokia 8 флагманини тақдим қилишни режалаштирган. Янги смартфон намойиши 16 август куни Лондонда бўлиб ўтади. Инсайдерларнинг "хизмати" билан ўқувчиларимизга янги мобил алоқа воситасининг рендер-суратларини ҳам намойиш қилиб келмоқдамиз. Шунингдек, Nokia 8 нархи билан боғлиқ навбатдаги маълумот ҳам интернет тармоғида эълон қилинди.
Руминиянинг Vodafone Romania мобил алоқа оператори бир оз шошқалоқлик қилиб, ўзининг сайтида Nokia 8'нинг нарх-навосини аввалдан маълум қилиб қўйди. Натижада, биз энди гаджетнинг Европада қанчадан сотилишини деярли билиб олдик.
Демак, тарқалган маълумотга кўра, Руминия смартфон нарх-навосида Ғарбий Европа қоидаларига амал қилишини инобатга олсак, Nokia 8 Европа смартфон бозорида 517,42 евродан сотилади.
Nokia 8'га хос жиҳатлар: 5,3 дюймли QHD (2560х1440 пикселли) экран, 4/6 Гб "оперативка", 64/128 Гб доимий хотира, Snapdragon 835 платформаси, 12 мегапикселли олд камера, Carl Zeiss линзаларига эга 13 мегапикселли қўш объективли бош камера, Android 7.1.1 Nougat дастурий таъминот тизими.