Nubia Z17 mini S: 4 камерали, бошланғич нархли смартфон тақдим қилинди

Nubia Z17 mini S: 4 камерали, бошланғич нархли смартфон тақдим қилинди

Nubia Z17S флагмани билан бирга, 12 октябрда яна бир -- ўрта нархли Nubia Z17 mini S смартфони ҳам тақдим қилинди. Девайс жиҳатлари унинг нархи билан солиштирилганда, диққатга сазовор хусусиятларга гувоҳ бўлиш мумкин.

Nubia Z17 mini S гаджети 5,2 дюймли FHD экранга эга бўлган ва Gorilla Glass 3 ҳимоя шишаси билан қопланган. Корпус шишадан тайёрланган ҳамда металл ром билан ўраб олинган.

Девайс самарадорлиги яп-янги ва флагман чиплардан бир оз орқада бўлган Snapdragon 653 процессори, Adreno 510 видео-картаси, X9 LTE мобил алоқа модеми, 6 ГБ тезкор ва 64 ГБ доимий хотирага боғлиқ. Доимий хотирани кенгайтиришнинг иложи йўқ.

Бош камера учун Sony'нинг 13 мегапикселли IMX258 русумли 2 та сенсорларидан фойдаланилган. Улардан бири рангли, бошқаси эса оқ-қора кўринишда суратга олади. Ёруғлик тақсимоти учун f/2.2 стандартидаги диафрагма масъул. Яъни, Z17S флагманидаги f/1.8 ҳажмли билан солиштирса, ёруғлик мосламаси бир оз орқада.

Бироқ, Nubia Z17 mini S олд камераси ҳам қўш сенсорли: 16 + 5 Мп (f/2.0 + f/2.2). Гарчи, олд фоточақноқ бўлмаса ҳам, суратга олиш вақтида дисплей ёритиш воситасига айланади.

Бу "ақлли телефон"да NFC ва USB Type-C портлари бўлса-да, флагман талқини каби, у ҳам 3,5 мм.ли аудио портдан маҳрум бўлган. Nubia Z17 mini S батареясининг сиғими 3200 мА соат.

Смартфон Wi-Fi (2,4/5 ГГц) ва Bluetooth 4.1 тармоқларида фаолият кўрсатади. Ўлчамлари: 147,5x71,2x7,6 мм, вазни -- 155 грамм.

Nubia Z17 mini S қора-тилларанг, тим кўк ва мовий рангли корпусларда ишлаб чиқарилади. Уни 19 октябрдан $305 доллардан харид қилиш мумкин бўлади.

Хабарларни тез ва осон ўқиш учун Андроид иловамизни сақлаб олинг.

Шуҳрат Сатторов

Журналист ва таржимон, 2012 йилдан ахборот технологиялари соҳасида фаолият юритиб келмоқда. Мобиль технологиялар, коммуникация, "электрон ҳукумат" тизими йўналишларида илмий изланиш олиб боради.