OnePlus 3’нинг камерасида олинган суратлар сифати ҳайратга сабаб бўлди

OnePlus компанияси раҳбари  Пит Лау ижтимоий тармоғидаги саҳифаси орқали компаниянинг яқин кунлар ичида тақдим этиладиган сўнгги – OnePlus 3 смартфонининг камерасида олинган илк суратларни ўртоқлашди.

14 июнь куни тақдим этилиши кутилаётган “ақлли телефон”нинг сифатли ва аниқ-тиниқ олган суратлари кўпчиликнинг муҳокамаси ва ижобий таассуротига сабаб бўлди.

Маълум бўлишича суратлари Пит Лаунинг ўзи томонидан туширилган ва OnePlus 3’да 16 МП бош ҳамда 8 МП олд камера бўлишидан гувоҳлик бериб турибди.

Оммабоп мобиль алоқа воситалари билан савдода пешқадам бўлган OnePlus компанияси ҳозирга қадар смартфон бозорига 2 та гаджетни тақдим қилган. Навбатдаги смартфон эса 14 июнь куни намойиш қилинади. Wall Street Journal нашрига берган интервьюсида компания раҳбари “ақлли соат” устида ҳам изланишлар олиб борилаётганини айтган.

Сўнгги маълумотларга кўра, 5 дюймли OnePlus 3 full-HD (1080×1920 пиксель сиғимли) дисплейга, Qualcomm Snapdragon 820 процессорига, икки талқиндаги, яъни 4 ГБ ва 6 ГБ тезкор хотирага, 32/64/128 ГБ доимий хотирага, сиғими 3500 мА соат бўлган аккумуляторга эга бўлади.

Смартфон Android 6.0 Marshmallow операцион тизимининг мослаштирилган версиясида фаолият кўрсатади.

Унинг 32 ГБ талқини 308 АҚШ доллари, 64 ГБ доимий ва 6 ГБ тезкор хотирага эга талқини 385 АҚШ долларидан сотувга чиқарилиши маълум қилинган.