OnePlus, ниҳоят, ўзига мос домен номини харид қилди
Интернет оламидаги энг обрўли сайтлар .com доменида рўйхатдан ўтган. Тарихда бирор таъсирли воқеа юз бермаганига қарамай, одамлар негадир .net ёки .biz доменидаги сайтлардан кўра .com доменида рўйхатдан ўтган сайтларга кўпроқ жиддий муносабатда бўладилар ва уларга кўпроқ ишонч билдирадилар. Шу сабабдан минглаб бизнес компаниялар ўз номлари остидаги ва .com билан тугайдиган сайтларни тезроқ эгаллаб олишга интиладилар. Йил сайин қўзиқориндек кўпайиб бораётган компаниялар ва интернет тармоқларида янада фаоллашаётган одамлар сабабли .com доменидаги керакли номлар бошқалар томонидан эгаллаб олиниши ҳолати тез-тез кўзга ташланмоқда. Ўзи учун истаган ном бошқа олғирлар томонидан илиб кетилган компаниялар бошқа номуносиб номлар ёки домен остида вебсайтлар очишга мажбур бўлади.
Хитойнинг ёш смартфон яратувчи компанияси OnePlus билан ҳам айни ҳолат содир бўлган эди. Бу компания энди мобил қурилмалар бозорига қўшилган вақтда oneplus.com вебсайтини рўйхатдан ўтказишга ҳаракат қилади. Афсуски, бу .com доменидаги бундай номли сайт бошқа компания томонидан аллақачон банд қилинган эди. Ёш компаниянинг эса сайтни сотиб олишга қурби етмайди. Шундан сўнг чорасиз қолган OnePlus нисбатан машҳур бўлмаган .net доменида oneplus.net вебсайтини рўйхатдан ўтказишга мажбур бўлади.
Куни кеча эса OnePlus, ниҳоят, ўзининг йилларга чўзилган орзусини амалга оширгани ҳақида маълум қилди: компания oneplus.com домен номини олдинги эгасидан сотиб олди. Ҳозирча харид миқдори ошкор қилинмаяпти, лекин узоқ йиллар давомида сотиб олишга қурби етмай келган OnePlus ҳозирги $1,4 миллиардлик молиявий ҳолатга эришгандан сўнг ушбу харидни амалга оширгани ҳисобга олинса, янги домен номининг қиймати миллионлаб долларга етишини тахмин қилиш мумкин.
Айни вақтда компания ўзининг эски .net доменидаги сайтини .com'га томон ўтказишни давом эттирмоқда. Ҳозирда oneplus.net вебсайтига кириш учун юборилган сўровлар oneplus.com томон йўналтирилаётганини кўриш мумкин.
oneplus.com домен номининг олдинги эгаси АҚШ жойлашган чиқиндиларни қайта ишлаш бўйича технологиялар ишлаб чиқиш билан шуғулланувчи OnePlus Systems компанияси бўлганлиги маълум қилинмоқда. Ушбу компания ўзининг асосий oneplussystems.com вебсайтига киришни енгиллаштириш мақсадида oneplus.com домен номини 2002 йилда рўйхатдан ўтказгани айтилмоқда. Шу вақтга қадар oneplus.com'га кириш учун юборилган сўровлар oneplussystems.com вебсайтига йўналтириб турилган. АҚШлик OnePlus'нинг асосий сайти ўзгаришсиз қолаётгани сабабли у oneplus.com домен номини сотишдан ҳеч нарса ютқизмаётганлигини англаш мумкин.
Вебсайтлар ҳақида маълумотларни тақдим қилувчи who.is хизматига кўра, oneplus.com домен номининг эгалиги бўйича сўнгги маълумотлар жорий йилнинг 16 мартида рўй берган. Демак OnePlus айни шу куни ўзи орзу қилган домен номини сотиб олган ёки харидни расмийлаштирган, деб тахмин қилиш мумкин.
OnePlus ниҳоят ўз орзусига эришгани шарофати билан вебсайтининг форумлар рукнида фойдаланувчилар учун ажойиб ютуқларга бой тадбир ташкил қилмоқда. Компания мухлислари ушбу форумда ўз ҳаётларида содир бўлган энг улкан воқеалар ва орзулари ушалган кун ҳақида ҳикоя қиладилар, тасодифан танлаб олинган бешта ҳикоя эгалари эса OnePlus'дан рюкзак ва ноутбук қабул қилиб олиш имкониятини қўлга киритади.
