Oppo MWC 2017’да фавқулодда мобиль камера технологиясини намойиш қилади
Хитойнинг етакчи компанияси Oppo Жаҳон Мобиль Конгресси олдидан анжуман кўргазмасида мобиль қурилмалар оламидаги энг яхши камерани ваъда қилаётган “5x Project” мобиль камера технологияси билан иштирок этишини маълум қилди.
Oppo вице-президенти Скай Ли ушбу бўлажак намойишни жаҳон смартфон фотографиясида “технологик инқилоб” ясашини айтиб ўтган. “OPPO’нинг мукаммаллик сари олиб борган тинимсиз изланишлари фавқулодда технологиянинг туғилишига хизмат қилди”, дейди компания раҳбари.
Компания релизида “5x Project технологияси смартфон фойдаланувчиларига ўта юқори сифатли суратлар олиш имконини беради”, дейилган. Компания ҳозирча қарталарини тўлиқ очмаяпти.
Айтиш жоизки, “Selfie Expert” номини олган Oppo томонидан сўнгги йилларда мобиль фотосурат сифати, жумладан бренд “ақлли телефон”ларида юқори сифатли селфи суратлар олиш, F1 Plus гаджети олд камерасига сиғими 16 МПгача бўлган объективларнинг ўрнатилиши уни маҳаллий смартфон бозори етакчисига айлантириб, жаҳон бозорига чиқишини таъминлади.
2016 йилнинг 4-чорак якунларига кўра, Oppo Хитойда энг кўп — 78.4 миллион дона смартфон етказиб берган. International Data Corporation (IDC) тадқиқот компаниясининг айтишича, бу 2015 йилдагидан 2 баробар кўп.
