OPPO сотилиш бўйича дунёнинг 4-рақамли смартфон брендига айланди
OPPO смартфонлари 2016 йилнинг 1-чорагида сотилиш бўйича бошқа бир хитойлик смартфон бренди Xiaomi’дан ўзиб кетган.
Gartner тадқиқот марказининг ёзишича, биринчи чорак мобайнида 16,112,600 дона OPPO мобиль алоқа воситалари сотилган. Xiaomi эса 15,048, 000 дона смартфон сотиб, рақибига ўрнини бўшатиб берган.
2015 йилнинг шу даврига нисбатан OPPO савдосидаги ўсиш 144,6% ни ташкил қилган. Аниқроқ айтадиган бўлсак, компания олдинги йилнинг шу даврига нисбатан бу чоракда 10 млн дона кўпроқ “ақлли телефон” сотган. Xiaomi савдосидаги ўсиш эса 300 мингни ташкил қилади.
Жорий йилнинг илк чорагида Samsung 81 млн., Apple 52 млн., Huawei 29 млн., дона смартфон сотишга муваффақ бўлган. 2015 йилнинг 1-чорагида 336,297,8 дона смартфон сотилган бўлса, жорий йилда жаҳон миқёсида жами 349,251,4 дона мобиль телефон аппарати харид қилинган.
Халқаро смартфон бозорида Samsung 24.1 фоиз улуш билан етакчилик қилмоқда. Сотилган смартфонларнинг 17,9 фоизи эса Apple ҳиссасига тўғри келади.
