Расмий: Nokia 8 флагмани сотувга чиқарилди

Расмий: Nokia 8 флагмани сотувга чиқарилди

Шу йилнинг 17 августида Nokia'нинг илк кучли -- Nokia 8 смартфони тақдим қилинган эди. Флагман 5.3 дюймли Quad HD дисплей, 8 ядроли кучли Snapdragon 835 процессори ҳамда қўш сенсорли бош камераси билан ўзига хос.

Кеча -- 6 сентябрда Nokia 8 флагман смартфони расман Германия ҳамда Австралияда сотувга чиқарилди. Девайс тез орада бошқа смартфон бозорларини ҳам "забт" этади.

Германияда Nokia 8 учун 579 евро сўралмоқда. Яъни, бу тахминан 690 АҚШ долларига тенг. Шунингдек, Amazon тармоғидан харид қилинган Nokia 8 учун бепул 64 гигабайтли SanDisk Ultra microSDXC хотира картаси қўшиб берилмоқда. Австралияда смартфон 799 австралия доллари, аниқроғи 719 АҚШ долларидан сотилмоқда.

Мобил алоқа воситасининг тезкор хотира сиғими 4 (DDR4X), доимий хотира эса 64 гигабайтли (UFS 2.1). Смартфон 256 ГБ.гача бўлган қўшимча хотирани қўллаб-қувватлайди. Шунингдек, Nokia 8'нинг кўк корпусли талқинига 128 гигабайтли хотира ўрнатилади.

Nokia 8 Android 7.1.1 (Nougat) тизимида ишлайди. Ишлаб чиқарувчининг сўзларига кўра, гаджетда Android хавфсизлик тизими ҳар ой янгиланади.

Nokia 8 девайсининг бош камераси 13 мегапикселли 2 та сенсордан иборат. Улар манзарани оқ-қора ва рангли кўринишда, шунингдек кенг бурчак остида муҳрлайди. Сенсорларнинг оптик линза сиғими f/2.0 ҳажмли. Селфи суратлар учун ҳам 13 мегапикселли сенсор танланган. Одатга кўра, уларда ZEISS линзаларидан фойдаланилган.

Смартфон алоқанинг 4G VoLTE, Wi-Fi 802.11ac (MIMO), Bluetooth 5.0, GPS/ GLONASS, USB Type-C 3.1 Gen 1, NFC каби тармоқларида ишлайди. Унинг қуввати учун 3090 мА соат сиғимли, Qualcomm Quick Charge 3.0 тезкор қувватлаш технологиясига эга аккумулятор жавобгар.

Сайтимизнинг энг чиройли расмларини Инстаграмдаги саҳифамизда томоша қилинг!

Мавзу:

#Nokia 8

Шуҳрат Сатторов

Журналист ва таржимон, 2012 йилдан ахборот технологиялари соҳасида фаолият юритиб келмоқда. Мобиль технологиялар, коммуникация, "электрон ҳукумат" тизими йўналишларида илмий изланиш олиб боради.