Redmi Note 5 Pro’га қарши майдонга тушаётган Meizu E3 бенчмаркда тест топширди

Meizu компанияси ўрта нарх доирасидаги E3 смартфонини тез кунларда тақдим этишга тайёргарлик кўрмоқда. Куни кеча компания раҳбарларидан бири уни жанубий кореялик техногигантнинг сўнгги флагмани билан таққослаб кўрсатган эди.

ЎҚИНГ: Тақдим этилмаган Meizu mblu E3 смартфонини Galaxy S9+ билан таққослашди (+видео)

Энди эса ушбу моделдаги смартфонни AnTuTu бенчмаркида синаб кўришгани ҳақида маълумот тарқалди. Тест ҳисоботига кўра, Meizu E3 қурилмаси Snapdragon 636 процессори базасида ишлайди.

Айтиш керакки, яна бир таниқли хитойлик смартфонсоз – Xiaomi компаниясининг яқинда тақдим этилган Redmi Note 5 Pro модели ҳам айни шу чипга асосланган. Meizu mblu E3 (ёки Meizu E3) смартфонининг хусусиятларига қараб, компания уни «хитойча Apple»нинг шу смаотфонига рақобатчи сифатида бозорга чиқаришини тахмин қилиш мумкин.

ЎҚИНГ: Янги Redmi Note 5 Pro'даги технология Galaxy S9'да ҳам йўқ!

AnTuTu маълумотлар базасида қолган ахборотларга кўра, Meizu E3 девайси 6 гигабайт тезкор ва 128 гигабайт доимий флэш-хотирага эга. Унинг экрани тасвир аниқлиги 2160х1080 пикселни ташкил этади.

Meizu E3 ушбу бенчмаркдаги тестда 112 478 балл тўплаган, бу эса Snapdragon 636 процессори имкониятларини ҳисобга олганда яхши натижа.

ЎҚИНГ: Етакчи смартфонсозлар уддалай олмаган технологияни Meizu қойиллатди!

Лекин қизиғи – унинг операцион тизими Android 7.1.1 талқинида, ҳолбуки, ҳозирда аксарият смартфонлар қадоқдаёқ Android 8 талқини билан тақдим этилмоқда. Тахмин қилиш мумкинки, Meizu синовда бозорга чиқариладиган якуний смартфонини эмас, балки ундан олдинги намунасини қўллаган. Расмий намойиш вақтигача унга кейинги талқиндаги операцион тизим жорий этилади ва унинг самарадорлиги яхши томонга ўзгаради.

Дастлабки маълумотларга қараганда, Meizu E3 асосий камераси 12 ҳамда 20 мегапикселли иккита датчикка эга бўлади, селфи-камераси эса 8 мегапикселли бўлиши тахмин қилинаётир. 3300 мА/соат сиғимли аккумуляторга эга бу смартфоннинг бармоқ изи сканери корпуснинг ён қиррасида жойлашган.

ЎҚИНГ: Кучли смартфон брендлари билан расман ишлайдиган дўкон очилиши кутилмоқда