Samsung Android Oreo'га янгиланадиган смартфонларни айтди
Android Oreo операцион тизими тақдим қилинганидан буён ярим йил вақт ўтиб кетди. 2017 йилнинг августида тақдим қилинган бу мобил платформа ўзининг илғор функциялари билан смартфон фойдаланувчиларга муҳим ва қизиқарли имкониятлардан фойдаланишга шароит яратиб беради. Шундай бўлса ҳам, жаҳоннинг йирик IT гиганти ҳозиргача бор-йўғи 3 та телефонлари – Galaxy S8, Galaxy S8+ ҳамда Galaxy Note 8 флагманларини сўнгги мобил тизимга янгилаш имконини яратиб берган эди.
Жанубий кореялик корпорациянинг бошқа телефонлари ҳам фирма ўзлаштирган Android Oreo операцион тизимида ишлай бошлайди.
Samsung компаниясининг маълум қилишича, ҳозирги ва кейинги ойдан бошлаб Android Oreo мобил тизимини Galaxy S7, Galaxy S7 edge, Galaxy A5 (2017), Galaxy A3 (2017), Galaxy A7 (2017) ҳамда Galaxy Xcover 4 смартфонларига юклаб олиш мумкин бўлади. Мазкур мобил қурилмаларнинг барчаси апрел-май ойларида янги платформага эга бўлишади.
Шу тахлит, яқин кунлар ичида 6 та смартфон модели энг янги операцион тизим – Android Oreo билан таъминланади. Шундан сўнг, яъни жорий йилнинг ёзидан компаниянинг бошқа смартфон моделлари, яъни Galaxy J туркумини ҳам янги тизимга янгилаш мумкин бўлади.
Android Oreo смартфонларнинг фаолиятини тезлаштириб, платформа самарадорлигини оширади. Шу билан бирга, қувватни тежаш алгоритмининг яхшиланиши эвазига смартфонларни бир марта қувватлаб, янада узоғроқ ишлаш имкони пайдо бўлади. Янги функциялар қаторида смартфонни спам-хатлардан ҳимоя қиладиган тизимни, огоҳлантиришлар учун махсус индикаторларни, «сурат ичида сурат», яъни бир вақтнинг ўзида экранда икки иловадан фойдаланиш, вируслардан ҳимояланган янги тизимлар каби илғор жиҳатларни айтиш мумкин.
Шу билан бирга, Android Oreo операцион тизимининг ўзлаштирилган талқини билан бирга, Samsung компанияси 9,7 дюймли Samsung Galaxy Tab S3 планшет компьютерининг янги талқинини ҳам тақдим қилади. Бу планшет Super AMOLED матрицали экран ҳамда ультра юпқа корпус билан таъминланади.
