Samsung Galaxy J3 (2016) – AMOLED экран, қулай эргономик дизайн

Сўнгги йилларда хитойлик брендларнинг арзон смартфон ишлаб чиқариб, жаҳон бозорини аста-секин эгаллаб бораётгани ҳеч кимга сир эмас. Шубҳасиз, бундай ҳолат смартфон саноатининг йирик компанияларини ташвишга солади ва улар ҳам арзон қурилмалар тайёрлаётган хитойлик шоввозларга қарши курашиш мақсадида турли янги гаджетларни яратишни бошлайдилар.

Мисол учун, мана шундай фирмалар қаторига иккиланмай Samsung компаниясини қўшиш мумкин. Агар Жанубий Корея технология гиганти аввалроқ фақат TFT экранли ва паст аниқликдаги камерага эга бўлган арзон моделларни ишлаб чиқарган бўлса, охирги икки йил давомида компания ўзининг мазкур йўналишини ўзгартиришга мажбур бўлди. Аниқроғи, Хитой фирмалари уни шундай йўналиш танлашга мажбур қилишди. Натижада Samsung яхши техник параметрларга эга ва бир вақтнинг ўзида арзон нархда таклиф этиладиган Хитой телефонларига қарши ўлароқ, Galaxy J сериясини ишлаб чиқди.

Samsung Galaxy J сериясидаги моделлар, энг аввало, ҳамёнбоп нархи ва нисбатан юқори техник параметрлари билан ажралиб туради. Биринчи навбатда, сериядаги смартфонларнинг AMOLED дисплей билан таъминланганини эътироф этиш зарур. AMOLED технологиясидаги дисплейлар фақат Samsung’га қарашли эканлиги кўпчиликка маълум бўлса керак. Бундай турдаги экран матрицаси рангларни бир мунча тиниқроқ акс эттириши ва кам қувват истеъмол қилиши билан фарқланади.

Бугун биз ушбу сериядаги сўнгги моделлардан бири бўлган Samsung Galaxy J3 (2016) тўғрисида сўз юритамиз. Модель Ўзбекистонда ҳам ўзининг етарли мухлисларига эга ҳамда энг кўп сотиладиган қурилмалардан ҳисобланади.

Дизайн ва корпус

Дизайн жиҳатидан Samsung Galaxy J3 (2016) ўтган йилда чиқарилган сериядаги моделлардан бироз фарқланса-да, унда J туркумидаги тенденция сақланиб қолган. Гаджет пластикдан ишланган, атрофидаги рамкалари кумушранг металл кўринишига эга. Албатта, бундай арзон нархда таклиф этиладиган смартфондан металл корпус ёки рамкани талаб қилиш бироз ноўрин.

Корпусдаги батареяни ечиш мумкин. У софт-тач пластикдан қилинганлиги боис кўлдан тойиб кетмайди. Габаритлари: 71 x 142.3 x 7.9 мм, оғирлиги — 138 г.

Анъанавий Home тугмаси олд томоннинг қуйи қисмида жойлашган. Қувват ва товуш баландлигини бошқаришга мўлжалланган тугмалар ўз ўрнида. Олд тарафда, шунингдек, фронтал камера ва қўнғироқ карнайи ҳам ўрин олган.

Орқа тарафда асосий камера, чақноқ ва динамик жойлашган. Моделнинг эргономикаси яхши, фойдаланиш қулай, қўлда яхши ҳис этилади.

Экран

Samsung Galaxy J3 (2016) моделига 5 дюймли Super AMOLED экран ўрнатилган. Экран олд панелнинг 68,2 фоизини эгаллайди, HD (720х1280) аниқлигида, дюймдаги пикселлар зичлиги – 294 та. Дисплей мультитачни қўллаб-қууватлайди, Asahi Drahotrail Glass технологияси билан ҳимояланган.

Рангларни табиий оттенкага анча яқин намойиш қилади, батарея қувватини бошқа экран турларига қараганда сезиларли даражада кам сарф этади.

Камера

Модель арзон нархли смартфонлар сегментига мўлжаллангани боис унга 8 МПли асосий камера ўрнатилган. Бироқ камера учун чақноқ кўзда тутилган ва у автофокус функциясига эга. Камера интерфейсида бир қатор тасвир эффектлари мавжуд. Шунингдек, тажрибали фойдаланувчилар Pro режими ҳам таклиф этилган. Мазкур режимда ISO кўрсаткичи, оқ ранг баланси ва экспокоррекция созламаларини қўлда созлаш мумкин. Бундан ташқари, кам ёритилган шароитда ҳам нисбатан сифатли суратлар олишга ёрдам берадиган HDR функция ҳам қўшилган.

Видеонинг максимум аниқлиги Full HD форматида бўлиб, кадрлар частотаси 30 FPS.

Асосий камера етарли ёритилган шароитда бир мунча сифатли кадрларни тушира олади.

Олд камеранинг аниқлик даражаси – 5 МП. У кўплаб параметрлар бўйича асосий камерада орқада. Бироқ ушбу камера ёрдамида етарли даражада сифатли селфиларни тасвирга туширса бўлади. Олд камерага ҳам бир нечта расм эффектларини қўллаш мумкин.

Модель камерасидан олинган расмлар:

Процессор

SM-J320F версияси (биздаги) 4 та Cortex A7 ядроси билан таъминланган Spreadtrum SC9830 процессорида ишлайди. Ишлаш частотаси – 1,5 ГГц. Процессорга Mali-400 MP4 график чипи ўрнатилган.

Худди шундай типдаги процессор 4G  тармоғини қўллаб-қувватламайдиган SM-J320H моделига ҳам жойланган. Гарчи процессорнинг параметрлари унчалик юқори бўлмаса-да, моделнинг ишлашида ҳеч қандай муаммо мавжуд эмас. Албатта, унга йирик ҳажмли ва кучли графикали ўйинларни ўрнатиш мақсадга мувофиқ эмас. Бироқ гаджетда ўртача ва енгил ўйинларни ўйнаса бўлади.

Хотира

Қурилманинг доимий хотира сиғими 8 ГБ ташкил қилади. Бироқ ушбу сиғимнинг бир қисми тизим файллари билан банд қилинган. Хотиранинг қолган сиғимига керакли иловаларни ўрнатиш мумкин. Бироқ доимий хотирани  microSD ёрдамида 128 ГБгача кенгайтириш имконияти мавжуд.

Оператив хотира ҳақида гапирадиган бўлсак, одатда, ҳамёнбоп моделларган 1 ГБ тезкор хотира ўрнатилади. Samsung Galaxy J3 (2016) эса 1,5 ГБ оператив хотирага эга. Бу кўрсаткич ўртаҳол смартфонлар учун ёмон эмас. Смартфон бир нечта иловалар билан ҳам текис ишлай олади.

Аккумулятор

Батареянинг сиғими 2600 мА/соат. Ушбу сиғим смартфондан бир кун мобайнида ўртача фаолликда фойдаланишга кифоя қилади. Агар смартфон анча фаол режимда (тинимсиз интернет, видео, камера ва ўйин) ишлатилса, батареянинг қуввати тахминан 6 соатга етиши мумкин.

Қувват кам қолган ҳолатлар ва қувватни тежаш учун моделда батарея сарфини тежаш ва ультра қувват тежаш режимлари кўзда тутилган. Ультра энергия тежаш режими ёқилганда, фақат муайян иловалардан фойдаланиш мумкин, холос. Бироқ автоном ишлаш вақти бу орқали анча узаяди.

Коммуникация ва дастур

Бизнинг қўл остимизда бўлган SM-J320F модели  2G/3G/4G тармоқларида фаолият кўрсатади. Навигация сенсорларидан GPS/ГЛОНАСС қўллаб-қувватланади. Симсиз файл узатилиши учун Bluetooth 4.0 ва бир диапазонли Wi-Fi модули жавоб беради. Шунингдек, моделдаги MicroUSB слоти OTG функцияга эга бўлиб, унинг ёрдамида ташқи қурилмаларни (масалн флешка) смартфонга улаш мумкин.

Модель TouchWiz интерфейсидаги Android 5.1 версиясида ишлайди. Қурилмага бир қатор Samsung ва Microsoft’га қарашли иловалар ўрнатилган. Айтмоқчи, модель фойдаланувчиларига Microsoft OneDrive серверидаги 100 ГБ онлайн хотирадан бепул фойдаланиш имконияти ҳам тақдим этилади. Дарвоқе, Smart Manager иловаси смартфон дастурини автоматик равишда оптималлаштиришга хизмат қилади.

Хулоса

Samsung Galaxy J3 (2016) гаджетида, энг аввало, сифатли экранни эътироф этиш керак. Super AMOLED технологиясидаги матрица бошқа типдаги матрицаларга қараганда рангларни тиниқроқ кўрсатади ҳамда батарея қувватини нисбатан камроқ сарфлайди. Шу билан бирга, модель 4G алоқасини қўллаб-қувватлайди. Эргономик дизайнга эга, фойдаланиш қулай. Камерасининг аниқлиги унча юқори бўлмаса-да, яхши ёритилган шароитларда бир қадар сифатли расмлар олиш мумкин. HDR ва Pro режимлари тасвир сифатини оширишга хизмат қилади.

Бир қатор ижобий параметрларга қарамасдан, қурилма камчиликдардан холи эмас. Galaxy J3 (2016) корпуси бутунлай пластикдан ишланган (бу эса корпуснинг барқарорлигига таъсир қилади), процессори кутилган даражада кучли эмас. Бундан ташқари, доимий хотиранинг камлиги ҳам бироз ноқулайлик туғдиради. Моделга бошқа вендорларнинг иловалари олдиндан ўрнатилган, ваҳоланки уларни Google Play’дан юклаб олиш мумкин.

Умуман олганда, модель ўз нархи сегментидаги талабларга жавоб беради. Ушбу нархга хитойлик ишлаб чиқарувчиларнинг бир қадар кучлироқ смартфонларини харид қилиш мумкин. Бироқ маҳсулотга бериладиган кафолат хизматини текшириш лозим. Сабаби агар мамлакатимизда уларнинг сервис марказлари фаолият кўрсатмаса, кейинчалик мазкур қурилмаларни таъмирлатиш муаммо бўлиши мумкин. Samsung эса Ўзбекистонда ўз маҳсулотларига сифатли кафолат хизмати кўрсатиши кўпчиликка маълум.