Samsung Galaxy Note 7’ни қайтариш учун ёнғиндан хавфсиз қути ва қўлқоп тарқатмоқда
Кеча сайтимизда Жанубий Кореянинг Samsung компанияси шу йилнинг август ойида глобал тақдимоти ўтказилган Galaxy Note 7 фаблетларининг савдосини расман буткул тўхтатгани ҳақида хабар берган эдик.
Эндиликда компания бутун дунё бўйлаб сотилган ушбу маркадаги смартфонларни расман қайтариб олишни бошлади. Samsung фойдаланувчилардан Galaxy Note 7’ни дарҳол ўчиришни ва харид қилинган сотув нуқтасига қайтаришни сўрамоқда. Шу мақсадда компания ҳатто мазкур модель фойдаланувчиларига махсус хавфсиз тўпламни ҳам тарқатмоқда. Тўпламга ёнғиндан хавфсиз қути, антистатик пакет, йўриқонома ва ҳимоя қўлқоплари киритилган.
Эслатиб ўтамиз, Samsung компанияси 2 сентябрда ўтказилган матбуот анжуманида (тақдимотдан роппа-роса бир ой ўтиб) Galaxy Note 7 батареяларида носозлик мавжудлигини расман тан олган ва шу ойнинг ўрталаридан уларни қайтариб олишни бошлаган. Бироқ янги партиядаги моделларда ҳам ёниб кетиш муаммоси бир неча марта такрорлангач, компания ушбу смартфонни тайёрлашни вақтинчалик тўхташини маълум қилган эди.
