Samsung Galaxy S9 бир жиҳати билан жаҳонни ҳайратга солмоқчи
2018 йилнинг январ ҳолатида, сурат олиш сифати бўйича жаҳонда Huawei Mate 10 Pro, Google Pixel 2 XL ҳамда Apple iPhone X энг яхши камерафонлар ҳисобланишади. Уларнинг барчаси тасвирни сифатли муҳрлашда бошланғич нархдаги DSLR-камералари билан ҳам баҳслаша оладилар. Шу билан бирга, яқинда улар ҳам бу борада ўз ўринларини йўқотадиган кўринадилар. Маълумотларга кўра, Samsung Galaxy S9 смартфони фотография сифати билан дунёни лол қолдирмоқчи.
Кеча Samsung компанияси жамоатчилик эътиборига Exynos 9810 флагман процессорини расман тақдим қилди. Бу чипсет жиҳатларига кўра айни пайтда жаҳонда энг етакчи экани экспертлар томонидан ҳам айтилмоқда. Бу жиҳатлар қаторида унинг смартфон камерасига берадиган имкониятини айтиш жоиз.
Хусусан, мазкур "электрон юрак"ка эга гаджет камераси секундига 120 кадрдан иборат 4K UHD сиғимли видео тасвирга олиш имконига эга бўлади. Бу борада ҳозирча iPhone X жаҳонда энг зўр ҳисобланади. У секундига 60 кадрдан иборат бўлган 4K UHD сиғимли видео ёза олади. Бошқа замонавий смартфонлар эса секундига 30 та кадрни муҳрлаш имконига эга. Кадр сони ошгани сайин тасвирнинг сифати ҳам ошади.
Шу билан бирга, Samsung Galaxy S9 ҳамда Galaxy S9+ флагманларида ўрнатиладиган Exynos 9810 процессори суратларни қайта ишлашнинг илғор алгоритмларига эга бўлишади. Айниқса, қоронғу ва ёруғлик паст шароитда олинган суратларни яхшилаш бўйича "сунъий ақл" функцияси жорий қилинади. Айни пайтда Жанубий кореялик корпорация жаҳоннинг кўплаб мамлакатларида «The Camera. Reimagined» номли савдо белгисини рўйхатдан ўтказган. У ўз номи билан айтиб турибдики, Samsung'нинг янги флагмани фотосурат ва видео олишда тенгсиз бўлади.
Кореялик журналистларнинг маълум қилишларича, Samsung Galaxy S9 ва унинг юқори талқинида суратни қайта ишлашга масъул бўлган 2 та мустақил чип бўлади. Улар суратдаги "шовқин" ва ялтираб қолган кадрларни тўғирлайди. Қолаверса, ҳам орқа ва олд камералардаги икки карралик оптик барқарорлаштириш тизими ҳам айни муддао.
Galaxy S9 ва Galaxy S9+ расмий тақдимоти 2018 йилнинг 26 февралида, Барселонада бўладиган MWC 2018 анжумани доирасидаги Galaxy Unpacked анжуманида бўлиб ўтади.
