Samsung ҳеч қачон "Galaxy S10"ни тақдим қилмайди
Жанубий кореялик тиниб-тинчимас корпорация бир неча йиллардан бери 2 флагманлар туркуми билан ишқибозларини хурсанд қилиб келмоқда. Ҳар йили "Galaxy S" ва "Galaxy Note" номлари остида турли рақамли кучли смартфонлар тақдим қилинади.
Samsung компанияси барча телефонларини рақамлаш ва номлашда кетма-кетликни бузмаган. Мисол учун, Apple компанияси iPhone 9 моделидан аввал iPhone Х'ни тақдим қилгани бир оз тушунарсиз бўлди.
Galaxy Note 7 тақдим этилиб, муаммолар сабаб ишлаб чиқаришдан олиб ташлангани ҳисобга олмаса, кореяликлар саноқда адашиб кетгани йўқ. Бироқ, кейинги йилда фирманинг янги смартфонлари янгича номлана бошлайди. Бу тўғрида энг ишончли манбалар хабар бермоқда.
Бренд 2019 йилда "Galaxy S10" моделини тақдим қилмайди. Боиси, унинг янги модели янгича ёндашувда номланади, яъни "Galaxy X". Ва, аҳамиятли жиҳати -- бренднинг кейинги смартфонларига ном қўйиш айнан "Х" қўшимчаси остида давом эттирилади.
Натижада, 2020 йилда жаҳон смартфон бозорига Galaxy X2, 2021 йилда – Galaxy X3 каби моделлар тақдим қилиниши кутилмоқда.
Янгича номдаги модел намойишига бир йилдан зиёдроқ вақт борлиги ҳисобга олинса, ҳозирча маркетологлар ва компания экспертлари бу ёндашувни чуқур муҳокама қилишмоқда.
Шу вақтгача ҳам Samsung компаниясининг режалари хусусида, айниқса букланадиган Galaxy X телефони ҳақида бир қатор янгиликлар тарқалган эди. Ҳозирча бу парадокснинг мазмуни бизга ҳам маълум эмас. Бироқ, 2019 йилда Galaxy S10'нинг бўлмаслиги аниқ.
Айтиш керакки, рақобат қилишни яхши кўрадиган Samsung смартфонлари учун "Galaxy X" номини бекорга танламади. Бунга уни Apple илҳомлантиргани аниқ. Худди шундай услуб "Note" туркумида ҳам татбиқ қилинади. Яъни, кейинги йилда "Galaxy Note 10" моделининг тақдимоти кутилмоқда.
