Samsung’нинг сканерли дисплей ва 3D-камерага эга смартфони ҳақида хабар қилинди
Жанубий кореялик техногигант жорий йилнинг февралида ўзининг янги флагманлари – Galaxy S9 ва S9+ моделларини тақдим этган эди. Июль ойининг охирлари ёки август бошларида, корпорациянинг навбатдаги йирик тақдимотида Galaxy Note 9 фаблетини кўрамиз.
ЎҚИНГ: Galaxy Note 9 iPhone 7'нинг муҳим жиҳатини ўзлаштиради
Шунингдек, аллақачон Galaxy S туркумидаги моделларнинг кейинги авлоди – Galaxy S10 ҳақида ҳам батафсил маълумот пайдо бўлди. Бу тўғрида The Bell нашри маърузасида хабар берилган.
Айтишларича, Samsung’нинг 2019 йилги флагманлари буклама экран ёки янгича тузилишга эга бўлмайди. Умуман, смартфонларнинг ташқи кўриниши бу йилги «аждод»ларидан кам фарқ қилади. Улар томонлари ўзаро 18,5:9 нисбатда бўлган Infinity Display дизайнидаги экранга эга.
Galaxy S10 моделининг дисплейи ўлчами ҳам ўзгармайди – диагоналига 5,8 дюймлигича қолади. Унинг «плюсли» талқини эса бироз «улғайиб», 6,3 дюймлик экран билан таъминланади.
ЎҚИНГ: Galaxy S10 – сканерли дисплейга эга 5G-смартфон процессори ҳақида маълумотлар чиқди
Ҳар иккала модел учун асосий янгилик – экраннинг пастки ҳудудига жойланадиган бармоқ изи сканери бўлади. Хабарга кўра, мазкур технология бу йилги Galaxy Note 9 моделига татбиқ этилмайди. Чунки унинг тақдимотигача Samsung бу датчикни тўлиқ тайёрлашга улгурмайди.
Жанубий кореялик гигантнинг Galaxy S10 моделларига киритиладиган яна бир янги технология уларнинг олд камераси билан боғлиқ. Уларга Исроилнинг Mantis Vision стартапи билан ҳамкорликда тайёрланаётган 3D-камералар ўрнатилади. Афтидан, бунақа камералар смартфон ҳимоясини таъминлаш учун юзни таниш тизимининг, шунингдек, анимацияли эмодзиларнинг ишлашини яхшилаш учун қўлланади.
ЎҚИНГ: Galaxy S10 қиёфани худди iPhone X каби танийди
Galaxy S10 ҳамда S10+ ҳақидаги бошқа маълумотлар ҳозирча сир тутилмоқда. Ахир, ҳали уларнинг тақдимоти ҳали 2019 йилнинг февралидан олдин бўлмаслиги маълум.
Бироқ Samsung унгача ҳам, Galaxy Note 9 фаблетидан ташқари, бир нечта моделларда ҳамёнбоп ва ўрта нархли смартфонлар ҳам намойиш этиши режалаштирилган.
ЎҚИНГ: Арзон Galaxy J6 (2018) смартфони FCC’да ҳам «кўринди» – тақдимот санаси яқинми?
