Samsung’нинг смартфондан даромади рекорд даражада ўсди
Кучли смартфонларга бўлган талаб туфайли жорий йилнинг 2-чораги Samsung Electronics учун сўнгги 2 йилнинг энг сердаромад даври бўлди.
Иккинчи чоракда даромад 18%га ошиб, $7.17 миллиард долларни ташкил қилган. Жумладан, мобиль алоқа воситалари савдосидан олинган даромадда ўсиш 57%ни ташкил қилади. Бунда асосан Galaxy S7 ва Galaxy S7 Edge флагманларининг ҳиссаси бўлган.
Компаниянинг маълум қилишича, бошқа компаниялар эълон қилаётан электрон қурилмалар ҳисобига бозорда рақобат кучайган ва навбатдаги чоракда намойиш этиладиган янги йирик экранли флагман қурилмалар ҳисобига Samsung Electronics смартфон бозоридаги етакчиликни сақлаб қолади.
Унинг рақиби бўлган Apple эса жорий ҳафта бошида 2-чоракда айфон қурилмалари савдосида 15 фоиз пасайиш кузатилганини маълум қилган эди. Бу эса осиёлик ишлаб чиқарувчини “илҳомлантириши” аниқ.
Шунингдек, Жанубий кореялик ахборот технологиялари гиганти хўжалик техникалари бозорида телевизор савдоси пасайиб, музлатгич, кир ювиш машинаси, кондиционерга бўлган талабнинг ошиб бораётганини ҳам маълум қилган.
Эслатиб ўтамиз, Samsung Electronics Co., Ltd — халқаро компаниясига 1969 йилнинг 13 январида асос солинган. Компания электроника, ярим ўтказгич қурилмалар, телекоммуникация қурилмалари, хотира карталари, суюқ кристалли дисплей, мобиль телефон ва монитор, хўжалик техника воситалари ишлаб чиқаради. «Самсунг» сўзи корейс тилида «уч юлдуз» маъносини англатади.
