Samsung’нинг янги ҳамёнбоп смартфони «қўлга тушди»: AMOLED-экранли ва NFC модулли!
Жанубий Кореянинг Samsung корпорацияси турли флагманлар қатори, ҳамёнбоп смартфонлар устида ҳам мунтазам ишлаб келади. Жумладан, унинг кўпчилик танимаган ҳамёнбоп телефон моделлари ҳам кўп.
ЎҚИНГ: Эксклюзив: Samsung 170 долларлик Galaxy J7 Nxt'ни сотувга чиқарди
Кечагина оммабоп GFXBench бенчмаркида мазкур техногигантнинг янги смартфони тестдан ўтганлиги ошкор бўлди. Янги модел Samsung Galaxy On7 Prime (2018) деб номланади ва унинг тақдимоти тез орада бўлиб ўтиши кутилаётир.
GFXBench маълумотларига кўра, бу смартфон диагонали 5,5 дюймли AMOLED-экран билан жиҳозланган бўлиб, дисплейининг тасвир аниқлиги 1920х1080 пикселни ташкил этади (яъни, Full HD форматида). Samsung мазкур қурилмасига ўзининг Exynos 7870 процессорини ўрнатмоқда; у 1,6 ГГц такт частотасида ишловчи саккизта ядрони жамлаган. Шунингдек, Mali-T830 график контроллери ҳамда 300 Мбит/сониягача тезликда маълумот алмаша оладиган LTE Category модеми ҳам унинг самарадорлигини оширадиган омиллардандир.
Янги моделга операцион тизим сифатида Android 7.1.1 Nougat талқини танланган, аммо бозорга чиқарилганидан кейин кўп ўтмасдан, уни ҳам Android 8.0 Oreo талқинигача янгилаш имкони бўлса керак.
ЎҚИНГ: Android 8.0 Oreo'га янгиланадиган Samsung смартфонлари битта рўйхатда!
Galaxy On7 Prime (2018) модели замонавий USB Type-C тирқишига, Wi-Fi 802.11ac ҳамда Bluetooth 5.0, шунингдек NFC модулларига эга. Гаджетнинг асосий камераси ҳам, олд камераси ҳам 13 мегапикселли якка датчиклардан иборат. Смартфоннинг тезкор хотираси 3, доимий хотираси эса 32 гигабайт ҳажмга эга. Шунингдек, унга 256 гигабайтгача ҳажмли microSD форматидаги хотира картасини қўйса бўлади.
Ҳозиргача аниқланган маълуотларга кўра, Samsung Galaxy On7 Prime (2018) смартфони эртага – 17 январдаёқ тақдим этилиши керак. Кузатувчилар унинг нархи 300 АҚШ долларидан ошмаслигини айтишмоқда.
Кореялик гигантнинг шу пайтгаач тақдим этилган кўпгина русумлардаги смартфонлари Ўзбекистонда ҳам савдога чиқарилган.
ЎҚИНГ: «Малика»да Samsung смартфонларининг сўмдаги нархлари (2018 йил 12 январь)
