Samsung принтер бизнесини HP’га сотди

Бугун эълон қилинган маълумотга кўра, Жанубий Кореянинг Samsung Electronics компанияси ўзига қарашли принтер бизнесини HP’га 1 миллард АҚШ доллари эвазига сотиб юборган. Бу ҳақда Samsung билан боғлиқ янлиликларни эълон қиладиган Sammobile нашри хабар берган.

Келишувга кўра  Samsung  принтер бизнесини алоҳида компанияга айлантиради ва шундан кейин уни HP’га сотишни бошлайди. Жанубий Кореялик гигант барибир HP компаниясига принтерлар учун эҳтиёт ва бутловчи қисмларни етказиб беришда давом этаверади. Шу билан бирга, компания Жанубий Корея ҳудудида HP томонидан ишлаб чиқарилган принтер ва бошқа чоп этиш қурилмаларини Samsung бренди остида сотишга келишиб олган.

Манбада келтирилган маълумотга кўра Samsung айни пайтда жаҳон принтер бозорида юзага келган кучли рақобат сабабли ушбу бизнесни сотишга қарор қилган. Чунки ҳозирда Canon, Epson ва турган гапки HP каби брендлар Samsung’га принтерлар бозорида кўп “нон” қолдирмаяпти. Компания бундан буён смартфон, хотира чипи ва телевизор бизнесига кўпроқ эътибор қаратишни режалаштирган. Албатта, бундай катта келишув натижасида Американинг HP компанияси Осиё қитъаси бозорларида ўз позициясини янада мустаҳкамлаши кутилмоқда.