Samsung расман Galaxy S9 тақдимотига таклиф қилди

Samsung расман Galaxy S9 тақдимотига таклиф қилди

Яқиндагина АҚШ да ўтказилган CES 2018 кўргазмасида компаниянинг мобил бўлинма президенти расман Samsung компаниясининг Galaxy S9 ва S9+ флагман смартфонлари яна бир нуфузли IT-кўргазма ҳисобланган MWC 2018 доирасида тақдим этилишини эълон қилган эди. Кеча компания тақдимот кунини расман эълон қилди ва оламшумул намойишга таклифнома тарқатишни бошлади.

Кутилганидек, Жанубий кореялик корпорациянинг Galaxy S9 ҳамда S9+ флагман смартфонлари MWC 2018 тадбири арафасида, яъни мазкур йилнинг 25 февраль куни тақдим қилинали.

Galaxy Unpacked деб ном олган тадбир Испаниянинг Барселона шаҳрида бўлиб ўтади ва унда бутун жаҳондан иштирок этаётган оммавий ахборот воситалари қатнашадилар.

Таклифномага илова қилинган суратга кўра, флагманларда қўш сенсорли камерага алоҳида эътибор қаратилган. Яъни, компания бу гал янги камера технологияси билан барчани ҳайратда қолдириш истагида.

Ҳозирча маълум хабарларга асосланадиган бўлсак, Galaxy S9 ҳамда S9+ флагманлари дизайни аввалги қимматбаҳо "аждодлари"никидан фарқ қилмайди.

Galaxy S9 ва Galaxy S9+ смартфонларининг экрани 5,6 ҳамда 5,8 дюймли дисплейдан иборат бўлади. Корпуснинг пастки қиррасида динамикдан ташқари, замонавий USB Type-C порти мавжуд.

Улардаги янгилик сифатида орқа панелдаги бармоқ изи сканерининг бош камера ёнига эмас, остига жойлаштирилишини айтиш мумкин. Шу билан бирга, юқори моделда орқа фонни ғира-шира қиладиган ва 2 карра яқинлаштириш технологиясига эга қўш сенсорли камералар бўлади.

Албатта, телефонларнинг техник имкониятлари тубдан ўзгариб, Европа учун 8 ядроли Exynos 9810 процессори, АҚШ ва Хитой учун Snapdragon 845 чипларида ишлаб чиқарилади. Бу процессорларнинг ҳар иккаласи юқори имкониятли. Уларда 3,5 мм ўлчамидаги аудио туйнук сақлаб қолинган. Шунингдек, корпуслари IP68 стандарти асосида чанг ва сувдан ҳимоя қилинган.

 

Сайтимизнинг энг чиройли расмларини Инстаграмдаги саҳифамизда томоша қилинг!