Samsung тўлиқ экранида кўплаб тирқишларга эга смартфон патентлади

Ўтган йилги смартфонлар орасида Apple’нинг юбилей айфони ўзининг юқориси «кемтик»ли қойилмақом экрани билан алоҳида ажралиб туради. Купертинолик гигантга эргашиб, бошқа смартфонсозлар ҳам айни шу дизайнда смартфон ишлаб чиқишга ҳаракат қилаётирлар.

ЎҚИНГ: Huawei P11 нафақат уч модулли камерага, балки iPhone X’даги яна бир «фишка»га ҳам эга бўлади

Аммо «тишланган олмали» корпорациянинг ашаддий рақиби – Samsung Electronics ўзгача йўлдан боришга қарор қилди. Аниқроғи, у экран дизайни борасида Apple’дан ҳам ўзиб кетишга ҳаракат қилаётир.

Жанубий кореялик техногигантнинг янги олган патентида жуда антиқа смартфон тасвирланган: унинг экрани олд панелни бутунлай эгаллаб олган. Дисплейда iPhone X’даги каби «кемтик» эмас, балки турли датчиклар ҳамда «Уйга» тугмачаси учун алоҳида-алоҳида «тирқиш»лар мавжуд.

Яъни, Samsung’нинг янги қурилмасида юқорида тилга олинган элементлар дисплейнинг тепасидаги ёки пастидаги ромида эмас, балки айнин экраннинг ўзида жойлашади – бунақаси ҳали бўлмаган!

Манбаларга кўра, Samsung шунақа ёндашувни Galaxy Note 9 фаблетидаёқ қўллаши мумкин. Бироқ мазкур патент олингани билан, Samsung ҳозирча бундай смартфонни чиқаришга шошилмаса керак.

ЎҚИНГ: Galaxy Note 9’да бармоқ изи сканери экраннинг ўзига жойланади