Samsung йирик смартфон бозорида "қулашда" давом этмоқда
Гарчи Samsung 2017 йилда ярим ўтказгичлар ишлаб чиқариш кўламини кенгайтириш эвазига рекорд даражада фойда олган бўлса ҳам, унинг мобил қурилмалар бизнеси бўйича бўлинмаси жаҳон смартфон бозоридаги ўрнини аста-секин бой бермоқда.
Samsung’нинг смартфон бизнесидан олаётган даромади жаҳон миқёсида сезиларли равишда камаймоқда. Мисол учун, дунёнинг йирик мобил алоқа воситалари бозори бўлган Хитойда кореялик бренд ўз ўрнини тобора бой бериб қўймоқда.
Ўқинг: Бу йил смартфон харидида эътибор қаратиш зарур муҳим жиҳатлар
Samsung’нинг Хитойдаги мобил қурилмалар, жумладан смартфонлар бозоридаги энг катта йўқотиши 2015 йилда содир бўлган. Ўшанда компания бир йилнинг ичида Хитой смартфон бозоридаги 20 фоиз улушини йўқотган эди. 2017 йилнинг учинчи чорагида эса Хитойда Samsung смартфонлари савдоси 2 фоизга камайган эди.
Бу пасайиш эса давом этмоқда. Мисол учун ўтган йилнинг сўнгги чорагида Samsung Хитой смартфон бозорида тағин 1.6 фоиз улушини бой бериб қўйди. Бу тўғрида Strategy Analytics маркетинг тадқиқотлари компанияси маълум қилган.
Samsung Хитой смартфон бозорида улушлари бўйича 12-ўринда туради.
Хитойни смартфон билан таъминлашда Huawei, Oppo, Vivo, Xiaomi ҳамда Apple "кучли бешлик"дан ўрин олган. Жаҳон миқёсида 2017 йилнинг энг пешқадам смартфон ишлаб чиқарувчиси ҳисобланган илғор Samsung эса бу ерда улардан анча орқада. Бу бевосита Хитойда кучли IT-ишлаб чиқарувчиларининг етишиб келаётгани билан боғланади.
"The Investor" нашрига берган интервьюсида Samsung вакили Хитойдаги смартфон савдосига оид статистик маълумотларнинг шубҳали эканини маълум қилган. Компаниянинг мобил қурилмалар бўлинмаси раҳбари DJ Koh ҳам шу йилнинг март ойида Хитой бозоридаги аҳволни яхшилаш бўйича чоралар кўрилишини айтган эди.
Хитойлик смартфон ишлаб чиқарувчилари Samsung’ни нафақат ўз уйларида, балки жаҳон бозорида ҳам доғда қолдиришда давом этмоқдалар. Жумладан, 2017 йилнинг якунларига кўра кореялик компания Ҳиндистонда ҳам хитойлик рақибларига мағлуб бўлган. Эслатиб ўтамиз ўтган йили Кореянинг яна бир йирик IT ишлаб чиқарувчиси бўлган LG Хитойдаги смартфон бизнесини расман якунлаган эди.
Samsung бир неча йиллардан бери жаҳоннинг иккинчи рақамли йирик смартфон бозори бўлмиш Ҳиндистонда смартфон сотиш бўйича яққол пешқадам бўлиб келган. Айни пайтда эса бу шарафли ном Xiaomi брендига тегишли.
