Сканерли дисплейга эга смартфоннинг сотувга чиқиш вақти ва нархи айтилди (+видео)

Хитойнинг Vivo компанияси CES 2018 кўргазмасига инқилобий смартфонини олиб келди – унда бармоқ изи сканери бевосита экраннинг ўзига интеграция қилинган. Vivo X20 Plus UD русумли мазкур қурилма учун янгича турдаги – Clear ID дактилоскопик датчигини Synaptics компанияси етказиб берган.

ЎҚИНГ: Vivo сканерли экранга эга илк смартфонни тақдим қилди

Гарчи смартфоннинг тақдимотида унинг техник хусусиятлари маълум қилинган эса-да, унинг қачон савдога қўйилиши, нархи каби тафсилотлар айтилмаган эди.

X20 Plus UD қурилмаси диагонали 6,43 дюймга тенг бўлган SuperAMOLED-экранга эга ва унинг томонлари ўзаро 18:9 нисбатда. Смартфоннинг самарадорлигини таъминлаш учун Qualcomm Snapdragon 660 процессори ҳамда 4 гигабайтлик тезкор хотира масъул. Ички хотираси ҳажми 64/128 гигабайтга, аккумуляторининг сиғими эса 3 900 мА/соатга тенг. Иккита SIM-картали бу телефоннинг асосий камераси 5 + 12 мегапикселли қўшалоқ объективга эга, селфи учун эса унга 12 мегапикселли камера ўрнатилган.

Мана, унинг дактилоскопик датчикли экрани қандай ишлашини қуйидаги лавҳада томоша қилинг:

Vivo вице-президенти Алекс Фэн сўзларига қараганда, ушбу смартфон жорий йилнинг бошида савдога чиқарилади. Яъни, Vivo X20 Plus UD мана шу январь ойининг охирида ёки февралда сотувга қўйилиши айтилмоқда. Унинг нархи тахминан 3 698 юанга тенг бўлишини маълум қилишган, бу эса тахминан 575 долларга тўғри келади.

Айтиш керакки, бармоқ изи сканерини экраннинг ўзига интеграция қилишга кўплаб етакчи смартфонсозлар ҳаракат қилишган. Аммо Vivo уларнинг барчасини доғда қолдириб, мазкур технологияга эга телефонни ҳаммадан бурун ишлаб чиқарди ва тақдим этди. Энди эса унинг савдога қўйилишини кутиш қолди, холос!

ЎҚИНГ: Apple ва Samsung уддалай олмаган технологияни Vivo амалга оширди