Snapdragon 845'га эга Galaxy S9 Plus AnTuTu'да имтиҳон топширди

Samsung Galaxy S9 ҳамда Galaxy S9 Plus флагманлари жорий йилда бир нечта талқинларда сотувга чиқарилиши режа қилинмоқда. Жанубий кореялик смартфон ишлаб чиқарувчиси бу талқинларнинг барчасини Snapdragon (АҚШ ва Хитой учун) ҳамда Exynos (бошқа давлатлар учун) брендларига мансуб чипсетларда ишлаб чиқаради.

Бугун интернет тармоғида мазкур флагманнинг энг юқори талқини ҳисобланган Samsung Galaxy S9 Plus модели смартфонларнинг самарали ишлашини баҳолайдиган AnTuTu бенчмаркида имтиҳон топширгани ҳақида маълумот эълон қилинди.

Бенчмаркдан синовдан ўтказилган Samsung Galaxy S9 Plus флагманига Snapdragon 845 процессори ўрнатилган.

Имтиҳон натижаларига кўра, "SM-G9650" модел рақамли смартфон экранининг пикселлар сиғими 2220х1440 белгига тенг ва дисплейнинг томонлар нисбати 18,5:9 стандартли, шу билан бирга, флагман 6 гигабайтли тезкор хотирага эга бўлган.

Samsung компаниясининг бўлажак "байроқдори" AnTuTu Benchmark имтиҳонларида 265,267 балл тўплаган.

Бу кўпми ёки камми?

Antutu бенчмаркида ўтган йилнинг сентябрида iPhone X флагмани 201,000 балл тўплаган эди. Бироқ, жаҳондаги энг самарали платформага эга смартфон сифатида iPhone 8 Plus 212,728 балл билан ҳозирча айфонлар ичида ўз "тахти"ни эгаллаб турибди.

2017 йилда Samsung Galaxy Note 8 смартфони самарадорликда 200,665 балл тўплаган эди. Шунингдек, мазкур рейтингда ўтган йили Google Pixel 2XL ҳам 203,109 балл тўплаган. 

2016 йилда бу ресурсда етакчи бўлган iPhone 7 Plus ҳамда iPhone 7 эса 172,644 ва 170,124 балл тўплашган. Samsung Galaxy S8’нинг Snapdragon 835 процессорига эга талқини ушбу имтиҳонда 162,101 балл тўплаган. Galaxy S8’нинг Exynos 8895 процессорига эга талқини эса 174,155 балл тўплашга эришган.

Ўқинг: Antutu: Октябр ҳолатида жаҳоннинг кучли смартфонлари, уларнинг Ўзбекистондаги баҳоси

Мобиль алоқа воситалари платформасининг самарадорлигини баҳолайдиган AnTuTu бенчмаркида “Samsung Galaxy S8” номи билан синовдан ўтказилган тестда жанубий кореялик илғор смартфон 205,284 балл тўплаган. Бу борада “улоқ”қа эга бўлиб келган америкалик iPhone 7 Plus 184,981 балл тўплаган эди.

Android-смартфонларнинг самарадорлик бўйича рейтингида, шунингдек Snapdragon 835 чипига эга OnePlus 5 смартфони 181,288 балл, Nubia Z17S 179,454 балл, Nubia Z17 эса 177,304 балл, Huawei Mate 10 смартфони 176,484 балл тўплаган.

Айтиш жоизки, Samsung Galaxy S9 Plus тўплаган балл ҳозирча якуний бўлмаслиги мумкин. Кейинги натижалар юқори бўлиши мумкин.